వాట్సాప్‌ పైనా కరోనా ఎఫెక్ట్: వాట్సాప్‌ కీలక నిర్ణయం.. ఇప్పటికే అమల్లోకి..

వాట్సాప్‌లో వీడియోను స్టేటస్‌గా అప్‌లోడ్ చేసే సందర్భంలో వీడియో నిడివి ఇన్నాళ్లూ 30 సెకన్లు ఉండేది. భారత్‌లో ఈ నిడివిని 15 సెకన్లకు కుదిస్తూ వాట్సాప్ నిర్ణయం తీసుకుంది. అంతేకాదు, నిర్ణయం తీసుకున్న వెంటనే అమలులోకి తెచ్చింది. దీంతో.. వాట్సాప్‌లో స్టేటస్‌గా వీడియోను అప్‌లోడ్ చేద్దామనుకునే వారికి 15 సెకన్ల వరకే అవకాశం ఉంది. అంతకు మించి అప్‌లోడ్ చేయాలంటే వీడియోను మరోసారి అప్‌లోడ్ చేసి కొనసాగింపుగా మరో 15 సెకన్ల వరకూ ట్రిమ్ చేయాల్సిందే.

ఇలా కాస్త ఎక్కువ నిడివి కలిగిన వీడియోను అప్‌లోడ్ చేయాలంటే ముక్కలుముక్కలుగా వీడియోను ట్రిమ్ చేయాల్సిందే. అయితే.. భారత్‌లో కరోనా వైరస్ కట్టడికి లాక్‌డౌన్ అమలవుతున్న నేపథ్యంలో ఇంటర్నెట్ వాడకం విపరీతంగా పెరిగింది. దీంతో.. సర్వర్లపై భారాన్ని తగ్గించే ఉద్దేశంతోనే ఈ నిర్ణయం తీసుకున్నట్లు వాట్సాప్ వెల్లడించింది. అయితే.. లాక్‌డౌన్ ఎత్తేశాక తిరిగి 30 సెకన్ల వీడియోను స్టేటస్‌గా పెట్టుకునేందుకు అవకాశం ఉంటుందో.. లేదో వాట్సాప్ యాజమాన్యం స్పష్టం చేయలేదు.