Advertisement
Advertisement
Latest Telugu News
Advertisement
Published: Mon, 27 Jun 2022 04:51:21 IST

విభ్రాంత క్రీడ

twitter-iconwatsapp-iconfb-icon
విభ్రాంత క్రీడ

ఆధారమే లేని భూమి బొంగరాన్ని

ఆది మధ్యాంతం బాటన ఆటబొమ్మను చేసి

ఆడించే అదృశ్య దారమేది


తూరుపు తెరచాప నావనెక్కి

చీకటి సముద్రపు చివరిబొట్టును సైతం

చిటికెలో తోడేసే చేతులెవ్వరివి


చండ ప్రచండ ప్రళయాగ్ని గోళాన్ని

పడమటి పళ్ళెంలో పరమాన్నం ముద్ద చేసి

ఆంబుక్క పెడుతున్న ఆననమేది


అవని అంచులమీద అలల విన్యాసాలతో

ఆడేటి జలకన్య అడుగులకు, తడబడని

ఆట నేర్పేటి ఆ ఆదిగురువెవ్వరు


కంటికే కనబడక సంచరిస్తూ

సర్వప్రాణులను ఊపిరుల ఉయ్యాలలో ఊపి

సయ్యాటలాడించు సాధుజంగమ ఎవరు


ఒత్తి లేదు, చమురు చుక్క లేదు

వెలిగించి ఆర్పేటి రేడు లేడు

విశ్వవినువీధుల్లో వెలిగేటి దీపాల

కాంతి కారకుడైన విభుడు ఎవడు


నేతగాడెవ్వడూ నేయనే లేదు

కంటికింపైన ఏ రంగు వేయనే లేదు

ప్రాణికోటిపై ఒల్లెడై ఒదిగిన

పారదర్శకపు పరదాను పరచిన ప్రభువెవ్వడు


తల్లెవ్వరో, దాని ఇల్లెక్కడో

తరగ తురగమై తారాడు తావెక్కడో

దగ్ధకేళికై ఇలపైన కాలు మోపగానే

కీలలను ఎగదోయు కాలుడెవ్వడు


పంచభూతాలు ఆడేటి అవ్యక్త ఆటలు

ప్రకృతి రహస్యంగా పాడేటి పారవశ్యపు పాటలు

కార్యకారక సంబంధ సంచలన దృశ్యాలు

మనిషి నబ్బురపరచే నైరూప్య భావచిత్రాలు


సృష్టి స్థితిలయల విభ్రాంత విన్యాస క్రీడలో

విశ్వమే మహా వింతకావ్యం


మర్మ, ధర్మాల మాటలు వేనవేలున్నా

విశ్వరహస్యాల శోధన యుగాలు దాటినా

అంతు చిక్కీచిక్కని వింత ప్రశ్నల చింతనలో


మనిషెప్పటికీ...

కలల కల్లోల అలలపై కదలాడు పడవనే

స్నిగ్ధ ఛాయల్లో అల్లాడు అన్వేషియే

తల్లి ఒడిలోన ఆటాడు పిల్లవాడే

గాజోజు నాగభూషణం

98854 62052


Advertisement
ABN Youtube Channels ABN Indian Kitchen ABN Entertainment Bindass NewsBindass News ABN Something Special ABN Devotional ABN Spiritual Secrets ABN Telugu ABN Telangana ABN National ABN International
Advertisement
OpinionPoll
Advertisement
Copyright © and Trade Mark Notice owned by or licensed to Aamoda Publications PVT Ltd.
Designed & Developed by AndhraJyothy.