పెద్దవాగు అవతలి ఒడ్డున చిక్కుకున్న రైతు
ABN , First Publish Date - 2022-09-28T03:48:45+05:30 IST
కుమరం భీం ఆసిఫాబాద్ జిల్లా దహెగాం మండల కేంద్రంలోని సమీపంలోని పెద్దవాగు అవతలి ఒడ్డుకు చిక్కుకున్న రైతును అధికారులు సురక్షితంగా ఇంటికి చేర్చారు.
- గజ ఈతగాళ్ల సాయంతో ఇంటికి చేర్చిన అధికారులు
దహెగాం, సెప్టెంబరు 27: కుమరం భీం ఆసిఫాబాద్ జిల్లా దహెగాం మండల కేంద్రంలోని సమీపంలోని పెద్దవాగు అవతలి ఒడ్డుకు చిక్కుకున్న రైతును అధికారులు సురక్షితంగా ఇంటికి చేర్చారు. తుమ్మిడి హనుమంతు అనే రైతు మంగళవారం వ్యవసాయ పనులు చేయడానికి పెద్దవాగు అవతల ఉన్న తన భూమి వద్దకు చుట్టుపక్కల రైతులతో కలిసి వెళ్లాడు. ఆ సమయంలో వాగులో నీటి పాయ స్వల్పంగా మాత్రమే వెళుతున్నది. కాగా సాయంత్రానికి పైనుం చి వరద రావడంతో వాగులో ఉధృతి పెరిగింది. గమనించిన అవత లివైపు ఉన్న రైతులు వాగు దాటి ఇవతలి వైపునకు చేరుకున్నారు. తుమ్మిడి హనుమంతు మాత్రం అవతలి వైపే ఉండిపోయాడు. దీంతో ఇవతలి వైపు వచ్చిన రైతులు అధికారులకు, కుటుంబీకులకు, గ్రామస్థులకు ఫోన్లో సమాచారం ఇచ్చారు. పోలీసులు, గ్రామస్థులు పెద్దవాగు వద్దకు చేరుకున్నారు. ఇద్దరు గజ ఈతగాళ్ల అవతలి వైపు వెళ్లి హనుమంతును ఒక మొద్దపై కూర్చొబెట్టి వారు ఈదుతూ కట్టెను ముందుకు తోస్తూ ఇవతలి ఒడ్డుకు చేర్చారు.