UAE, కువైత్, సింగపూర్ వెళ్లే భారతీయులు.. ఆయా దేశాల కొత్త ట్రావెల్ గైడ్‌లైన్స్‌పై ఓ లుక్కేయండి..

ఇంటర్నెట్ డెస్క్: ప్రపంచవ్యాప్తంగా కరోనా మహమ్మారి ప్రభావం క్రమంగా తగ్గుతుండడంతో చాలా దేశాలు ప్రయాణ ఆంక్షలను సడలిస్తున్నాయి. ఇదే కోవలో యూఏఈ, కువైత్, సింగపూర్ కూడా ప్రత్యేకంగా భారతీయ ప్రయాణికుల కోసం ప్రయాణ మార్గదర్శకాలను సవరించాయి. అందుకే ఆయా దేశాలకు వెళ్లే ఆలోచనలో ఉంటే అవి సవరించిన ప్రయాణ మార్గదర్శకాలను తెలుసుకోవడం బెటర్. ఈ మూడు దేశాలు భారతీయ ప్రయాణికుల కోసం మార్చిన ట్రావెల్ గైడ్‌లైన్స్‌‌పై ఓ లుక్కేద్దాం...

యూఏఈ ప్రయాణ మార్గదర్శకాలివే..

భారత్ నుంచి తమ దేశానికి వచ్చే ప్రయాణికుల కోసం యూఏఈ తాజాగా ప్రయాణ మార్గదర్శకాలను సవరించింది. వ్యాక్సినేషన్ పూర్తైన ప్రయాణికులు తమ జర్నీకి ముందు చేయించుకునే ఆర్‌టీ-పీసీఆర్ పరీక్ష ఇకపై అవసరం లేదు. అయితే, వ్యాక్సినేషన్ సర్టిఫికేట్‌ను ఎయిర్ సువిధ పోర్టల్‌లో అప్‌లోడ్ చేయాల్సి ఉంటుంది. ఇక వ్యాక్సినేషన్ పూర్తికాని ప్రయాణికులు ప్రయాణానికి 72 గంటల ముందు టెస్టు చేయించుకున్న ఆర్‌టీ-పీసీఆర్ పరీక్ష తాలూకు నెగెటివ్ ధృవపత్రాన్ని సువిధ పోర్టల్‌లో అప్‌లోడ్ చేయాలి. అలాగే ప్రయాణికుల్లో ఎవరికైనా రోగ లక్షణాలు ఉంటే థర్మల్ స్క్రీనింగ్ అనంతరం కొత్త మార్గదర్శకాలనుసారం చికిత్స అందించడం జరుగుతుంది. 

సింగపూర్ సవరించిన ట్రావెల్ గైడ్‌లైన్స్..

సింగపూర్ ఎయిర్‌లైన్స్ (ఎస్ఐఏ) నివేదిక ప్రకారం భారతదేశం నుండి వీటీఎల్ (వ్యాక్సినేట్ ట్రావెల్ లేన్‌లు) విమానాల ద్వారా వచ్చే వారి కోసం ప్రయాణ మార్గదర్శకాలను నవీకరించినట్లు తెలిసింది. ప్రయాణికులు తప్పనిసరిగా 7 రోజుల ట్రావెల్ హిస్టరీని చూపించాలి. అలాగే ప్రయాణికులు గత 7 రోజులగా సింగపూర్‌లో ఉన్నట్లయితే, సింగపూర్‌లో వారి ఆ 7 రోజుల బస ట్రావెల్ హిస్టరీలో లెక్కించబడుతుంది. 

కువైత్ ప్రయాణ మార్గదర్శకాలు..

కువైత్ కూడా తన ప్రయాణ మార్గదర్శకాలను  అప్‌డేట్ చేసింది. సవరించిన మార్గదర్శకాల ప్రకారం, చెల్లుబాటు అయ్యే ప్రయాణ పత్రాలను కలిగి ఉన్న ప్రయాణీకులు వారి వ్యాక్సినేషన్ స్టేటస్‌తో సంబంధం లేకుండా కువైత్‌లోకి ప్రవేశించడానికి అనుమతించబడతారు.