12-15 ఏళ్ల పిల్ల‌ల కోసం.. ఫైజ‌ర్ టీకాను ఆమోదించిన యూఏఈ

అబుధాబి: ఇటీవ‌ల అగ్రరాజ్యం అమెరికా పన్నెండేళ్ల నుంచి పదిహేనేళ్లలోపు పిల్లలకు ఫైజర్‌ కరోనా వ్యాక్సిన్‌ అత్యవసర వినియోగానికి ఆ దేశ‌ ఆహార, ఔషధ నియంత్రణ సంస్థ (ఎఫ్‌డీఏ) ఆమోదించిన విష‌యం తెలిసిందే. తాజాగా గ‌ల్ఫ్ దేశం యూఏఈ కూడా 12-15 ఏళ్ల పిల్లలకూ ఫైజర్‌ టీకా ఇవ్వ‌డానికి ఆమోదం తెలిపింది. ఈ మేర‌కు ఆ దేశ ఆరోగ్య‌శాఖ.. ఫైజ‌ర్‌-బ‌యోఎన్‌టెక్ సంయుక్తంగా రూపొందించిన క‌రోనా టీకాను 12-15 ఏళ్ల పిల్లల కోసం అత్య‌వ‌స‌ర వినియోగానికి ఆమోదం తెలుపుతూ ఉత్త‌ర్వులు జారీ చేసింది. జాతీయ టీకా ప్ర‌ణాళిక సంఘం సూచ‌న‌తో పాటు ట్ర‌య‌ల్స్‌లో ఈ వ్యాక్సిన్ చూపిన ప్ర‌భావం, సామ‌ర్థ్యం ఆధారంగా వినియోగానికి అంగీక‌రించినట్లు ఆరోగ్య‌శాఖ వెల్ల‌డించింది. ఈ నిర్ణ‌యం మ‌హ‌మ్మారి నుంచి 12-15 ఏళ్ల పిల్లలను ర‌క్షించేందుకు ఉప‌యోగ‌ప‌డుతుంద‌ని పేర్కొంది. ఇక ఇటీవ‌ల క‌రోనాపై పోరులో భాగంగా అబుధాబి ఆరోగ్య‌శాఖ‌, అబుధాబి ప‌బ్లిక్ హెల్త్ సెంట‌ర్‌(ఏడీపీహెచ్‌సీ), దుబాయ్ హెల్త్ అథారిటీ సంయుక్తంగా దేశ‌వ్యాప్తంగా నివాసితులు, దేశ పౌరుల కోసం ఉచిత టీకా కార్య‌క్ర‌మాన్ని నిర్వ‌హించింది.