రెండు దారులు
ABN , First Publish Date - 2020-10-19T06:14:10+05:30 IST
జీవిత గమనం ఎప్పుడూ ఒక్క దారి కాదు అది రెండు దారులు...
జీవిత గమనం
ఎప్పుడూ ఒక్క దారి కాదు
అది రెండు దారులు
మొదటి దారి సులువయింది
ఎలాంటి మలుపులూ వుండవు
ఆ దారి ప్రపంచానికి భిన్నమయిందేమీ కాదు
ఈ దారిలో నియమాల అనేక ప్రాంగణాలుంటాయి
ఎన్నో సంబంధాల
బంధనాలుంటాయి
కానీ
ఈ దారిలో నడిచేవారికి
సంతోషాలు పేరుకే దొరుకుతాయి
వాళ్ళు ముక్కలు ముక్కలై
అనేక బంధాల నడుమ విభజింపబడుతారు
వారికంటూ ఏమీ మిగలదు
అంతా పేరు లేని ఓ గందరగోళం
ఇందులో మిగిలేదేమిటి
వారి కలలూ, స్వయంభావనా
శ్వాసాగ్నిలో కాలిపోతాయి
ఈ దారిని ఎంచుకున్న వాళ్ళు
లోకాన్ని సంతోషపరచడానికి
తమని తామే కోల్పోతారు
పైన బతికి ఉన్నట్టే కనిపించినా
లోన మరణిస్తారు
ఇక రెండో దారి కష్టతరమయింది
ఇక్కడ నీతో ఎవరూ వుండరు
సహాయానికి చేయందించరు
ఈ దారిలో మండే ఎండలుంటాయి
నీడలుండవు
ఈ దారిలో
దానంగానైనా ఇచ్చే ఓదార్పులుండవు
అలాంటి ఓ ఊరూ ఉండదు
తమ వైపు తాము పయనించేవారూ
తమని తాము కనుగొనే వారి కోసమే
ఈ దారి
నువ్వు ఈ దారినే ఎంచుకో
నాకు తెలుసు
ఈ దారి అంత సులభమయింది కాదు
కానీ
ఇప్పటిదాకా నిన్ను నువ్వు తెలుసుకోలేదనే
బాధ నన్ను కలిచివేస్తున్నది
(కూతురు జోయా కోసం)
జావేద్ అఖ్తర్
ఆంగ్లానువాదం: డేవిడ్ మాత్యు
తెలుగు: వారాల ఆనంద్