అమెరికా చరిత్రలో సరికొత్త అధ్యాయం.. ట్రాన్స్‌జెండర్‌కు కీలక పదవి !

వాషింగ్టన్: అగ్రరాజ్యం అమెరికా చరిత్రలో సరికొత్త అధ్యాయం నమోదైంది. ఇంతకుముందెన్నడూ లేనివిధంగా తొలిసారి ఓ ట్రాన్స్‌జెండర్‌కు కీలక బాధ్యతలు అప్పగించింది జో బైడెన్ సర్కార్. శిశువైద్యురాలు, ట్రాన్స్‌జెండర్ మహిళ రాచెల్ లెవిన్‌ను బైడెన్ ఆరోగ్య సహాయ కార్యదర్శిగా ఆమోదిస్తూ బుధవారం సెనేట్ చారిత్రాత్మక నిర్ణయం తీసుకుంది. పెన్సిల్వేనియా ఆరోగ్య శాఖ చీఫ్ అయిన రాచెల్‌ను ఈ ఏడాది జనవరిలో బైడెన్ ఈ కీలక పదవికి నామినేట్ చేశారు. బుధవారం రాచెల్ నామినేషన్ నిర్ధారించేందుకు సెనేట్‌లో ఓటింగ్ నిర్వహించారు. దీంతో రాచెల్‌ను 52-48 ఓట్ల తేడాతో సెనేట్‌ ఆమోదం తెలిపింది. ఇక తనకు దక్కిన ఈ కీలక పదవి పట్ల ఆనందం వ్యక్తం చేసిన రాచెల్.. 5.45 లక్షల మంది అమెరికన్లను పొట్టనబెట్టుకున్న మహమ్మారిపై పోరునే తన తొలి లక్ష్యంగా పేర్కొన్నారు.