మేలు మరవని పులి!

ఒక పులి ఒకరోజు మాంసం తింటుండగా నోటిలో ఎముక ఇరుక్కుపోయింది. దాంతో పులి బాధతో విలవిలలాడింది. ఆ పులి బాధను చాలా సేపటి నుంచి గమనిస్తున్న పక్షి, పులి దగ్గరకు వచ్చి ‘‘ఏం జరిగింది? ఎందుకు బాధపడుతున్నావు?’’ అని అడిగింది. అప్పుడు పులి ‘‘నా కోరల మధ్యలో  ఎముక ఇరుక్కుంది. నొప్పి పుడుతోంది. దయచేసి నాకు సహాయం చేస్తావా’’ అని అడిగింది. ఆ పక్షి మొదట భయపడింది. ‘పులి నోటిలో తల పెట్టడమంటే చావును కొని తెచ్చుకోవడమే’ అని మనసులో అనుకుంది.

పక్షి భయాన్ని గమనించిన పులి ‘‘నువ్వు నాకు సహాయం చేస్తే నిన్ను ఎప్పటికీ మరిచిపోను. నీకు ఏ సహాయం కావాలన్నా చేస్తాను. నా ఆహారంలో కొద్దిగా నీకూ పెడతాను’’ అంది. అందుకు పక్షి సరేనంది. పులి నోటిలో ఇరుకున్న ఎముకను జాగ్రత్తగా తన ముక్కుతో బయటకు తీసింది. అప్పటి నుంచి పులి, పక్షి రెండూ స్నేహితులుగా మారాయి. ఒకరోజు ఒక వేటగాడు చెట్టుపైనున్న ఆ పక్షిపైకి బాణం గురి పెట్టాడు. అది గమనించిన పులి ఒక్కసారిగా గర్జించింది. దాంతో వేటగాడు భయంతో పరుగు అందుకున్నాడు. తన ప్రాణాలను కాపాడినందుకు పులికి పక్షి కృతజ్ఞతలు చెప్పింది.