నేడు కలెక్టరేట్ ముట్టడి
ABN , First Publish Date - 2022-01-20T04:54:50+05:30 IST
పీఆర్సీ.. ఫిట్మంట ఎగసింది. ప్రభుత్వ నిర్ణయంపై నిరసనగా ఫ్యాప్టోలో ఉన్న 12 ఉపాధ్యాయ సంఘాలు ఈ నెల 20న చేపడుతున్న కలెక్టరేట్ ముట్టడికి మరికొన్ని ఉపాధ్యాయు సంఘాలు మద్దతు పలికాయి.
ఫ్యాప్టోకు ఉపాధ్యాయ సంఘాల మద్దతు
సాలూరు రూరల్, జనవరి 19: పీఆర్సీ.. ఫిట్మంట ఎగసింది. ప్రభుత్వ నిర్ణయంపై నిరసనగా ఫ్యాప్టోలో ఉన్న 12 ఉపాధ్యాయ సంఘాలు ఈ నెల 20న చేపడుతున్న కలెక్టరేట్ ముట్టడికి మరికొన్ని ఉపాధ్యాయు సంఘాలు మద్దతు పలికాయి. మరోవైపు జేఏసీ సైతం ఈ ముట్టడికి మద్దతు ఇస్తూ ఉద్యోగులంతా పాల్గొనాలని పిలుపునివ్వడం గమనార్హం. పీఆర్సీపై బుధవారం ఉద్యోగ, ఉపాధ్యాయులు నల్లబ్యాడ్జీలతో విధులకు హాజరయ్యారు. కలెక్టరేట్ ముట్టడి విజయవంతం చేయడానికి ఫ్యాప్టోనేతలు సన్నాహక సమావేశాలను కూడా నిర్వహించారు. అరెస్టులకు బెదరొద్దని నేతలు పిలుపునిచ్చారు. ఉద్యోగ,ఉపాధ్యాయులు సమ్మెకు వెళ్లడానికి జేఏసీ ఈ నెల 21న సమ్మె నోటీసు ఇస్తామని ప్రకటించిన విషయం విదితమే. ఈ నేపథ్యంలో ముందుగా జరుగుతున్న కలెక్టరేట్ ముట్టడికి స్పందన అధికంగా ఉంటుందని పోలీసులు భావిస్తు భద్రతా ఏర్పాట్లలో నిమగ్నమయ్యారు.