Abn logo
Jan 25 2021 @ 00:42AM

తప్పు నాదే

ఎప్పటి నుంచో

తింటూ ఉన్నా కదా

అతను

ఎందుకు గుర్తుకు రాలేదు


ఎండకు చెట్టు కిందకెళ్లి

ఇంటికొచ్చి చెట్టును మర్చిపోయినట్టు

దాహం అయినప్పుడు

ఆబగా నీళ్లు తాగి

నీటిని

మర్చిపోయినట్టు

అతన్ని కూడా జ్ఞప్తికి తెచ్చుకోకపోవడం

మూడు పూటలా

తప్పుచేసినట్టే


ఇప్పుడు

చలికి వణుకుతూ 

బాగా తడిసి వాలిన పంటలా ఉన్నాడు

ఎండకు కాగుతూ

ముట్టుకుంటే కాలిపోయే కర్రులా ఉన్నాడు

అతడిది

కయ్య గుండె

బువ్వ పెట్టిన చెయ్యి

వానపాముల

జెర్రిగొడ్డుల

ఎండ్రకాయల

ఎలుక పిల్లల

చెలికాడు


జొన్నకంకుల పూత పాడే 

కుశాల పాట

అవును

అతను ఎందుకు గుర్తుకు రాలేదు


మట్టికి

పురుడుపోస్తున్నవాడు

సేద్యం అంటే

వ్యాపారం కాదనుకున్నవాడు


వాడు ఇప్పుడు

కుతకుత ఉడికే మెతుకులా ఉన్నాడు

పోరాటాన్ని చల్లి

సేద్యానికి సిద్ధమౌతున్నాడు

అవును

ఇంత కాలం

అతను ఎందుకు గుర్తుకు రాలేదు

సుంకర గోపాలయ్య

94926 38547


Advertisement
Advertisement
Advertisement