అమెరికాలో తెలుగమ్మాయి ఘనత

• కరోనా చికిత్సపై పరిశోధనకు రూ.18.33 లక్షల బహుమతి

హ్యూస్టన్‌, అక్టోబరు 19: కరోనాకు చికిత్స విధానాన్ని కనుగొన్న 14 ఏళ్ల తెలుగు బాలిక అనికా చేబ్రోలు అమెరికాలో రూ.18.33 లక్షల(25 వేల అమెరికా డాలర్లు) బహుమతి గెలుచుకుంది. 3ఎం చాలెంజ్‌ సంస్థ నిర్వహించిన యంగ్‌ సైంటిస్ట్‌ చాలెంజ్‌లో అనికా.. కరోనా చికిత్సలో సార్స్‌-కోవ్‌-2 ప్రొటీన్‌ను కట్టిపడేసే అణువును ఇన్‌-సిలికో మెథడాలజీ ద్వారా కనిపెట్టింది. ఈ విధానం కొవిడ్‌కు శక్తిమంతమైన చికిత్సగా గుర్తించిన 3ఎం చాలెంజ్‌ సంస్థ అనికాకు మెంటర్‌గా డాక్టర్‌ మహ్ఫూజా అలీని నియమించింది. ఆయన సాయంతో అనికా ఈ వేసవిలో తన పరిశోధనను పూర్తి చేసింది. టెక్స్‌సలోని ఫ్రిస్కోలో 8వ తరగతి చదువుతున్న అనికా గత ఏడాది తీవ్రమైన జ్వరంతో బాధపడింది. దీంతో ఇన్‌ఫ్లుయెంజాకు మందు కనుక్కోవాలని నిర్ణయించుకుంది. కొవిడ్‌ కల్లోలం తర్వాత తన దృష్టిని కరోనా వైరస్‌ నిర్మూలనపై పెట్టింది.