Aid workersగా మహిళలను అడ్డుకుంటున్న తాలిబన్లు
ABN , First Publish Date - 2021-11-06T17:43:01+05:30 IST
సమాజంలో మహిళల హక్కులను కాలరాసే చర్యలకు ఇప్పుడప్పుడే తాలిబాన్ ఫుల్స్టాప్ పెట్టేలా కనిపించడం లేదు. తాజాగా తాలిబన్లు జారీ చేసిన ఆదేశాలే దీనికి నిదర్శనం.
కాబూల్ : సమాజంలో మహిళల హక్కులను కాలరాసే చర్యలకు ఇప్పుడప్పుడే తాలిబాన్ ఫుల్స్టాప్ పెట్టేలా కనిపించడం లేదు. తాజాగా తాలిబన్లు జారీ చేసిన ఆదేశాలే దీనికి నిదర్శనం. హ్యూమన్ రైట్స్ వాచ్ (HRW) ప్రకారం... ఆఫ్ఘన్ మహిళలు ఇక మీదట ఎయిడ్ వర్కర్లుగా పని చేయడంపై తాలిబన్లు నిషేధం విధించారు. ఇది నిజానికి ఆప్ఘన్ల ప్రాణ రక్షణకు సంబంధించిన విషయం. ఆఫ్ఘన్ మహిళలపై ఈ నిషేధం విధించడం ద్వారా అత్యవసర సమయంలో ఆఫ్ఘన్లకు ఎలాంటి సాయమూ అందకుండా పోతుందని స్థానిక మీడియా వెల్లడించింది.
"మహిళా సహాయ కార్మికులపై తాలిబన్ విధిస్తున్న దారుణమైన ఆంక్షలు ఆఫ్ఘన్లకు మరీ ముఖ్యంగా చెప్పాలంటే మహిళలు, బాలికలు, మహిళలు-నేతృత్వం వహించే కుటుంబాలకు అవసరమైన ప్రాణ రక్షణ సాయం అందకుండా నిరోధిస్తున్నాయి’’ అని హ్యూమన్ రైట్స్ వాచ్లోని అసోసియేట్ మహిళా హక్కుల డైరెక్టర్ హీథర్ బార్ చెప్పినట్లు TOLO న్యూస్ వెల్లడించింది.
34 ప్రావిన్స్లలో కేవలం మూడు మాత్రమే అధికారికంగా మహిళా కార్మికులను పనిచేయడానికి అనుమతించాయని HRWని ఉటంకిస్తూ వార్తా ఛానెల్ వెల్లడించింది. అక్టోబర్ 28, 2021 నాటికి, కేవలం మూడు ప్రావిన్సులలోని తాలిబాన్ అధికారులు మాత్రమే మహిళా సహాయక కార్మికులను తమ ఉద్యోగాలు చేయడానికి బేషరతుగా అనుమతిస్తూ రాతపూర్వక ఒప్పందాన్ని అందించారని తెలిపింది.