జేబుల్లోంచి ముందు ఆ చేతులు తీయండి: యువరాజ్

న్యూఢిల్లీ: ఆస్ట్రేలియా పర్యటనలో ఉన్న భారత జట్టు మూడు వన్డేల సిరీస్‌లో ఓటమి పాలైంది. తొలి రెండు వన్డేల్లోనూ ఓడిన టీమిండియా.. చివరిదైన మూడో వన్డేలో మాత్రం విజయం సాధించి పరువు కాపాడుకుంది. చివరి వన్డే ముగిసిన అనంతరం టీమిండియా ఆటగాడు శుభ్‌మన్ గిల్ తన ఇన్‌స్టాగ్రామ్ ఖాతాలో మూడో వన్డేకు సంబంధించి కొన్ని ఫొటోలు పోస్టు చేశాడు. ‘‘నా దేశానికి ప్రాతినిధ్యం వహిస్తున్నందుకు గొప్పగా ఉంది’’ అని వాటికి క్యాప్షన్ తగిలించాడు. ఈ ఫొటల్లో ఒకదాంట్లో గిల్ ప్యాంటు జేబులో చేతులు పెట్టుకుని నిల్చున్నాడు. ఈ ఫొటోకు టీమిండియా మాజీ ఆల్‌రౌండర్ యువరాజ్ సింగ్ సరదాగా స్పందించాడు. మీరు ఆడుతున్నది దేశానికని, క్లబ్ క్రికెట్ కాదని చురకలు అంటించిన యువీ.. జేబులో ఆ చేతులేంటని ప్రశ్నించాడు. జేబులోంచి వాటిని తీయాలని సూచించాడు.