‘పుష్ప’ సినిమాతో దర్శకుడు సుకుమార్ పేరు జాతీయ స్థాయిలో మారుమోగుతోంది. సక్సెస్ అవుతుందనుకున్నారే కానీ.. ఈ స్థాయి విజయాన్ని ఎవరూ ఊహించలేదు. బాలీవుడ్‌లో రెగ్యులర్ చిత్రాల్ని సైతం ‘పుష్ప’ అసాధారణ రీతిలో పక్కకు నెట్టి సెన్సేషనల్ హిట్ కైవసం చేసుకుంది. ఈ సినిమా భారీ విజయంతో సుకుమార్ తో సినిమాలు చేయడానికి అన్ని భాషల హీరోలూ ఉత్సాహం చూపిస్తున్నారు. ఓ బాలీవుడ్ హీరో తన దర్శకత్వంలో సినిమా చేయాలనుకుంటున్నాడని ఈ మధ్య ఓ ఇంటర్వ్యూలో సుకుమార్ రివీల్ చేశాడు. ఇంతలో ఓ తమిళ స్టార్ హీరోతో సుకుమార్ ఓ సినిమా చేయబోతున్నాడనే వార్త సోషల్ మీడియాలో గుప్పుమంటోంది. ఆ హీరో మరెవరో కాదు ధనుష్.
ఈ వార్తలో నిజానిజాలేంటో తెలియదు కానీ.. సుకుమార్ కథకు ధనుష్ బాగా ఇంప్రెస్ అయ్యాడని త్వరలోనే ఈ సినిమా అనౌన్స్ మెంట్ రాబోతోందని సమాచారం. ఆల్రెడీ శేఖర్ కమ్ముల దర్శకత్వంలో ధనుష్ ఓ సినిమాకి కమిట్ అవగా.. ఇటీవల వెంకీ అట్లూరి దర్శకత్వంలో ధనుష్ హీరోగా ‘సార్’ అనే మూవీ షూటింగ్ కూడా మొదలయింది. తమిళంలో ఈ సినిమా ‘వాత్తి’గా విడుదలకానుంది. ‘పుష్ప’ లో బన్నీ మాస్ అప్పీల్ కు, పెర్ఫార్మెన్స్ కు ఫిదా అయిపోయిన ధనుష్ తాను కూడా సుకుమార్ దర్శకత్వంలో సినిమా చేయాలని ఫిక్స్ అయ్యాడట. అందుకే ఈ ప్రాజెక్ట్ సెట్ అయిందని టాక్స్ వినిపిస్తున్నాయి. ప్రస్తుతం ధనుష్ కు కోలీవుడ్ లో బోలెడన్ని కమిట్ మెంట్స్ ఉన్నాయి. సుకుమార్ సైతం పుష్ప2 తో బీజీ కాబోతున్నాడు. ఈ నేపథ్యంలో వీరి కాంబో మూవీ ఇప్పట్లో సెట్స్ పైకి వెళ్ళే అవకాశాలు లేవు.