ఎలక్ర్టిక్ ఆటోల కొనుగోలుకు ‘స్త్రీనిధి’ రుణాలు
ABN , First Publish Date - 2020-09-25T09:18:13+05:30 IST
ప్రజా రవాణా, సరుకు రవాణాకు వినియోగించే ఎలక్ర్టిక్ ఆటోల కొనుగోలు కోసం మహిళా స్వయం సహాయక సభ్యులకు రుణం అందించాలని స్త్రీనిధి బ్యాంకు నిర్ణయించింది...
- బ్యాంకు పాలకమండలి నిర్ణయం
హైదరాబాద్, సెప్టెంబరు 24 (ఆంధ్రజ్యోతి): ప్రజా రవాణా, సరుకు రవాణాకు వినియోగించే ఎలక్ర్టిక్ ఆటోల కొనుగోలు కోసం మహిళా స్వయం సహాయక సభ్యులకు రుణం అందించాలని స్త్రీనిధి బ్యాంకు నిర్ణయించింది. కనిష్ఠంగా జిల్లాకు 30 చొప్పున మొత్తం 1000 ఆటోలకు ఈ రుణాలు అందజేయాలని తీర్మానించింది. స్త్రీనిధి బ్యాంకు పాలకవర్గ సమావేశం గురువారం సంస్థ కార్యాలయంలో జరిగింది. ముర్రా, సంకర జాతి పాడి పశువుల కొనుగోలుకు రూ. 75 వేల చొప్పున 50 వేల యూనిట్లకు, వ్యవసాయ యంత్రాలు, పనిముట్లను అద్దెకు ఇచ్చే కేంద్రాలను నెలకొల్పే సమాఖ్యలకు రూ. 25 లక్షలు రుణం అందించాలని పాలకవర్గం నిర్ణయించింది. ఎస్సీ, ఎస్టీ, దివ్యాంగ సభ్యులకు అధిక మొత్తంలో రుణాలు అందించాలని ఈ సమావేశం తీర్మానించింది.