తాబేలు-పక్షి

ఒక చెట్టుపై గూడు పెట్టుకుని పిల్లలతో కలిసి ఓ పక్షి ఆనందంగా జీవిస్తోంది. ఒకరోజు ఆ దారి గుండా తాబేలు వెళుతూ అదే చెట్టు కింద విశ్రాంతి కోసం ఆగింది. చెట్టుపై ఉన్న గూడును చూసి పక్షితో ‘‘నీదీ ఒక ఇల్లేనా? విరిగిన పుల్ల ముక్కలతో కట్టుకున్నావు. పైన నీడ లేదు. అంతేకాకుండా, మీ ఇంటిని మీరే నిర్మించుకోవాలి. నన్ను చూడు. నా పెంకే నా ఇల్లు. నీ గూడు కన్నా ఇది చాలా నయం కదూ!’’ అంటూ ఎద్దేవా చేసింది. 

ఆ మాటలు విన్న పక్షి... ‘‘అవును. నాది పుల్లలతో కట్టుకున్న గూడే. చూడటానికి చిరిగి పోయి కనిపిస్తుంది. కానీ నేను కష్టపడి కట్టుకున్నాను. ఈ ఇల్లంటే నాకెంతో ఇష్టం’’ అంది.

‘‘నువ్వు నా పెంకు చూసి అసూయపడుతున్నావు కదూ!’’ అంది తాబేలు.

‘‘నా గూడు నా కుటుంబ సభ్యులకే కాకుండా, స్నేహితులకు కూడా చోటునిస్తుంది. నీ పెంకు నీకు తప్ప మరొకరికి చోటు కల్పించలేదు. నీకూ ఇల్లు ఉంది కావచ్చు కానీ, నాకు మంచి ఇల్లు ఉంది’’ అని సమాధానమిచ్చింది పక్షి.

పక్షి సమాధానం విన్న తాబేలు మెల్లగా అక్కడి నుంచి జారుకుంది.