టీకా వేయించుకోని.. విదేశీ సందర్శకులపై సౌదీ ప్రత్యేక ఆంక్షలు
ABN , First Publish Date - 2021-05-11T14:20:23+05:30 IST
టీకా తీసుకోని విదేశీ సందర్శకులపై సౌదీ అరేబియా ప్రత్యేక ఆంక్షలు విధించింది. ప్రభుత్వ ఆమోదం పొందిన హోటళ్లు, ఇతర చోట్ల ఏడు రోజుల పాటు క్వారంటైన్‌లో ఉండడం తప్పనిసరి చేసింది.
రియాద్: టీకా తీసుకోని విదేశీ సందర్శకులపై సౌదీ అరేబియా ప్రత్యేక ఆంక్షలు విధించింది. ప్రభుత్వ ఆమోదం పొందిన హోటళ్లు, ఇతర చోట్ల ఏడు రోజుల పాటు క్వారంటైన్‌లో ఉండడం తప్పనిసరి చేసింది. మే 20 నుంచి ఈ కొత్త నిబంధన అమలులోకి వస్తుందని సౌదీ సివిల్ ఏవియేషన్ అథారిటీ(జీఏసీఏ) సోమవారం వెల్లడించింది. సౌదీ పౌరులు, విమాన సిబ్బంది, దౌత్యవేత్తలకు ఈ నిబంధన నుంచి మినహాయింపు ఇచ్చింది. విదేశీ ప్రయాణికులకు క్వారంటైన్ ఏర్పాట్ల కోసం విమానయాన సంస్థలు పర్యాటక మంత్రిత్వ శాఖ సహాయం తీసుకోవాలని పేర్కొంది. ఈ క్వారంటైన్‌కు అయ్యే ఖర్చులను విమాన టికెట్‌ ధరతో కలిపి తీసుకోవాలని సూచించింది. రెండు డోసుల టీకా పూర్తి చేసుకున్న ప్రయాణికులు వ్యాక్సినేషన్ పూర్తైనట్లు ధృవపత్రం చూపిస్తే వారికి క్వారంటైన్ అవసరం లేదు. అలాగే ఎనిమిదేళ్లకు పైబడిన నాన్-సౌదీ ప్రయాణికులు జర్నీకి 72 గంటల ముందు తీసుకున్న పీసీఆర్ నెగెటివ్ సర్టిఫికేట్ చూపించడం కూడా తప్పనిసరి.
