Advertisement
Advertisement
Latest Telugu News
Advertisement

సాగు.. జాగు

twitter-iconwatsapp-iconfb-icon
సాగు.. జాగు దుక్కి దున్నిన పొలం

జిల్లాలో తీవ్ర వర్షాభావం 

46 శాతం లోటు వర్షపాతం

నైరుతి వచ్చి నెల గడిచినా కురవని వర్షాలు

ఆందోళనలో అన్నదాతలు

ఇప్పటికి 2 శాతమే పంటల సాగు

22 మండలాల్లో చినుకే లేదు..


నరసరావుపేట, జూలై 2: సాగుకు ప్రకృతి సహకరించడంలేదు.. వానలు కురవడంలేదు. జిల్లాలో తీవ్ర వర్షాభావం నెలకొంది. సాగు ఆలస్యమవుతోంది. పంటల సాగుకు పొలాలు దున్నిన రైతులు విత్తనం విత్తేందుకు వర్షాల కోసం ఆశగా ఆకాశం వైపు చూస్తున్నారు. వరుణుడు కరుణించక పోతుండటంతో సాగు సందిగ్ధంలో పడుతోంది. సాగుకు అన్ని విధాల సమాయత్తమైన రైతులను నైరుతి నిరాశపరుస్తోంది. ఇప్పటికి కేవలం 2 శాతమే పంటలు సాగైనట్టు వ్యవసాయ శాఖ గణాంకాలు తెలియజేస్తున్నాయి. గత ఏడాది ఈ సమయానికి 30 శాతం వరకు పంటలు సాగు చేశారు. జిల్లాలో పంటల సాగుకు గడ్డుకాలం నెలకొనడంతో అన్నదాతలు తీవ్ర ఆందోళన చెందుతున్నారు. 

 జూన్‌ మొదటివారంలో కురవాల్సిన వానలు జూలై మొదటివారం వచ్చినా వాటి జాడ కనిపించడంలేదు. నైరుతిలో వర్షాలు సమృద్ధిగా కురుస్తాయని వ్యవసాయ శాఖ ప్రకటించినా చినుకు రాలడంలేదు. ఇప్పటికి సాధారణ వర్షపాతం 89.10 మి.మి. నమోదు కావాలి. 48.10 మి.మి వర్షపాతం నమోదైంది. 46 శాతం వర్షపాతం లోటు ఏర్పడింది. జిల్లాలోని 28 మండలాల్లో 22 మండలాల్లో తీవ్ర వర్షాభావం నెలకొంది. రెండు మండలాల్లో అధిక, నాలుగు మండలాల్లో సాధారణ వర్షాలు కురిశాయి.  

 పత్తి విత్తనం రైతులు విత్తేందుకు పొలాలను సిద్ధం చేశారు. విత్తనాలు కొనుగోలు చేశారు. వర్షం కురవకపోతుండటంతో విత్తనం నాటే పరిస్థితి లేదు. జిల్లాలో పత్తి సాగు విస్తీర్ణమే అధికం. మిరప, వరి విస్తృతంగా సాగు అవుతాయి. పత్తి సాధారణ విస్తీర్ణం 3,42,568 హెక్టార్లు. ఇప్పటికి 12,990 హెక్టార్లలో మాత్రమే సాగైంది. 2 శాతం మాత్రమే పత్తి సాగు చేసినట్టు వ్యవసాయ శాఖ ప్రకటించింది. గత ఏడాది ఈ సమయానికే 30 శాతం అంటే 97,520 ఎకరాల్లో పత్తి సాగు చేశారు. మిరప సాధారణ విస్తీర్ణం 1,44,655 ఎకరాలు కాగా ఒక్క ఎకరంలో కూడా మిరప సాగు కాలేదు. గత ఏడాది ఈ సమయానికి 4,339 ఎకరాల్లో మిరప సాగు చేశారు. అపరాల సాగు ఇలానే ఉంది. అపరాల సాధారణ విస్తీర్ణం 61,290 ఎకరాలు కాగా 9,498 ఎకరాల్లో సాగు చేశారు. ముమ్మరంగా వ్యవసాయ పనులు జరగాల్సిన తరుణంలో వ్యవసాయ కార్మికులకు పనులు లభించడం లేదు. వర్షాల కోసం రైతులు వరుణుడిని ప్రార్థిస్తున్నారు.  


Advertisement
ABN Youtube Channels ABN Indian Kitchen ABN Entertainment Bindass NewsBindass News ABN Something Special ABN Devotional ABN Spiritual Secrets ABN Telugu ABN Telangana ABN National ABN International
Advertisement
OpinionPoll
Advertisement
Copyright © and Trade Mark Notice owned by or licensed to Aamoda Publications PVT Ltd.
Designed & Developed by AndhraJyothy.