Abn logo
Nov 30 2020 @ 03:07AM

రాతి నిద్ర

నల్ల ముసుగేసుకుని

పాకుడుపట్టిన వాన

నాలో ధారాపాతంగా కురుస్తోంది

ఎంతకీ తెరిపివ్వని వాన

తాటాకు కప్పని దేహంపై

ముసురు చీకట్లు

దోసిటితో ఎత్తిపోస్తుంది


అన్నిటినీ చూరులో కుక్కి

ఆశల వుట్టి కుండకు వేలాడుతూ

సగం కొరికి వదిలేసిన చంద్రుణ్ణి

ఆబగా చప్పరించాలని చూస్తాను


నెమ్మదిగా

గడియతీసి

గుమ్మం బయటకొచ్చి చూస్తానా

నల్ల మీగడి చీకటి

వూరంతా కమ్మేసి వుంటుంది


ఉలిక్కిపడి

వెనక్కి తిరిగి చూస్తానా

నీరెండా కాలపు

చప్పట్ల ఊరేగింపులో

చేతులు కట్టుకున్న అవిటితనమేదో

పూనకంతో వూగిపోతుంటుంది


భయం భయంగా

దొడ్డెనక తలుపు

సన్నగా తెరుస్తాను


నిద్రగన్నేరు చెట్టు కింద

భేటీ బచావో

తన నడుమును తానే విరగ్గొట్టుకుని

ఛిద్రమైన యోని, తెగిన నాలుకతో

తనకు తానే నిప్పంటించుకుంటుంది


ఎటూ పాలుపోని

ఒకానొక రాతి నిద్ర

సరీసృపాల్లా పాదాలను చుట్టేసి

నా గొంతు నొక్కేయమని

నన్నే వుసిగొల్పుతుంటుంది


***

దేశం మొత్తం

నిండుకుండలా ప్రవహించే నిశ్శబ్దం

ఇపుడు నీలోనూ నాలోనూ

నెత్తురు గడ్డకట్టిస్తోంది

మేడక యుగంధర రావు

90320 56738


Advertisement
Advertisement
Advertisement