వార్డు సభ్యులు బాధ్యతలు తెలుసుకోవాలి
ABN , First Publish Date - 2021-10-26T03:22:37+05:30 IST
పంచాయతీ వార్డు మెంబర్లు, ఉప సర్పంచులు తమ బాధ్యతలను తెలుసుకోవాలని పంచాయతీరాజ్‌ డిప్యూటీ కమిషనర్‌ ఎస్‌.శివశంకర్‌ ప్రసాద్‌ పేర్కొన్నారు.
పీఆర్‌ డిప్యూటీ కమిషనర్‌ శివశంకర్‌ ప్రసాద్‌
దగదర్తి, అక్టోబరు 25: పంచాయతీ వార్డు మెంబర్లు, ఉప సర్పంచులు తమ బాధ్యతలను తెలుసుకోవాలని పంచాయతీరాజ్‌ డిప్యూటీ కమిషనర్‌ ఎస్‌.శివశంకర్‌ ప్రసాద్‌ పేర్కొన్నారు. స్థానిక ఎమ్పీడీవో కార్యాలయంలో సోమవారం జరిగిన 10 పంచాయతీలకు చెందిన వార్డు మెంబర్లు, ఉపసర్పంచుల శిక్షణ కార్యక్రమాన్ని ఆయన పరిశీలించారు. ఈ సందర్భంగా సచివాలయ వ్యవస్థ, ప్రభుత్వ పథకాలను గురించి తెలియచేసే కరదీపికలను పంపిణీ చేశారు. అనంతరం ఆయన మాట్లాడుతూ ఎంపీ, ఎమ్మెల్యే ప్రజలచేత ప్రత్యక్షంగా ఎలా ఎన్నుకోబడ్డారో వార్డు మెంబర్లు కూడా అలాగే ఎన్నుకోబడ్డారని, ప్రతి ఒక్కరు తమ బాధ్యతలను, విధులను తెలుసుకోవాలన్నదే ఈ కార్యక్రమం ముఖ్య ఉద్దేశం అన్నారు. ఈ కార్యక్రమంలో డీఎల్పీవో ఏ. రమేష్‌, ఎమ్పీడీవో ఆర్వీ కళాధర్‌రావు, తదితరులు పాల్గొన్నారు.
అల్లూరు : గ్రామ పంచాయతీల్లో ఉప సర్పంచులు, వార్డు సభ్యులకు స్థానిక మండల పరిషత్‌ కార్యాలయ సమావేశ మందిరంలో సోమవారం శిక్షణ తరగతులు నిర్వహించారు. ఈ శిక్షణ తరగతులను పంచాయతీరాజ్‌ శాఖ డిప్యూటీ కమిషనరు శివశంకర ప్రసాద్‌ పరిశీలించారు. ఈ సందర్భంగా ఆయన మాట్లాడుతూ వార్డుసభ్యులు శిక్షణలో చెప్పే అంశాలపై అవగాహన కలిగి పరిపాలనలో భాగస్వాములు కావాలని తెలిపారు. అనంతరం మహాత్మా గాంధీ, అంబేద్కర్‌ చిత్రపటాలకు పూలమాలలు వేసి నివాళులర్పించారు. ఈ కార్యక్రమంలో మండలాధ్యక్షురాలు దర్శిగుంట శశిరేఖ, ఉపాధ్యక్షుడు గుమ్మడి సురేంద్రబాబు, జడ్పీటీసీ వేణమ్మ, ఎంపీడీవో నగే్‌షకుమారి, ఈవోపీఆర్డీ ఎస్‌.మహేశ్వరి తదితరులు పాల్గొన్నారు.
