Abn logo
Sep 27 2021 @ 00:58AM

పర్యావరణానికి పొగ

నర్సీపట్నంలో విచ్చలవిడిగా పాలిథిన్‌ క్యారీ బ్యాగులు వాడకం

40 మైక్రాన్ల కంటే తక్కువ వున్న కవర్లు విక్రయం

అవికూడా పూర్తిగా నాసిరకం 8 నిబంధనలకు తూట్లు

నెలకు 100 టన్నుల వరకు వ్యర్థాలు

పట్టించుకోని మునిసిపల్‌ అధికారులు


నర్సీపట్నం, సెప్టెంబరు 26:

మునిసిపాలిటీలో నాసిరకం పాలిథిన్‌ సంచుల వినియోగం విచ్చలవిడిగా జరుగుతోంది. టిఫిన్‌ సెంటర్లు, పకోడీ బండ్లు, చికెన్‌ షాపులు, ఫాస్ట్‌ ఫుడ్‌ సెంటర్లు, కర్రీ పాయింట్లు, కూరగాయల దుకాణాలు...ఇలా పలురకాల వ్యాపారులు తక్కువ మందం గల పాలిథిన్‌ క్యారీబ్యాగులను వినియోగిస్తున్నారు. 40 మైక్రాన్లకంటే తక్కువ మందంగల పాలిథిన్‌ సంచుల ఉత్పత్తి, విక్రయం, వినియోగాన్ని ప్రభుత్వం నిషేధించినప్పటికీ నర్సీపట్నంలో ఇది అమలు కావడం లేదు. దీంతో ఆయా వ్యర్థాలు వీధుల్లో, డ్రైనేజీల్లో, ఖాళీ స్థలాల్లో పేరుకుపోతున్నాయి. నెలకు సుమారు 100 టన్నుల వరకు పాలిథిన్‌ వ్యర్థాలు వస్తుంటాయని మునిసిపాలిటీ ప్రజారోగ్య శాఖ సిబ్బంది అంచనాగా చెబుతున్నారు.

పల్లెలు, పట్టణాలు, నగరాలు అనే తేడా లేకుండా పాలిథిన్‌ కవర్ల వినియోగం నానాటికీ విపరీతంగా పెరిగిపోతున్నది. పర్యావరణానికి ఇవి ఎంతో ప్రమాదకరమని, పలురకాల సమస్యలకు దారితీస్తాయని శాస్త్రవేత్తలు ఎంతగా మొత్తుకుంటున్నప్పటికీ వీటి వాడకం తగ్గడం లేదు. నీరు, ఆహారం, కూరగాయలు, పాలు, పండ్లు...ఇలా ప్రతిదానికి పాలిథిన్‌ వినియోగిస్తున్నారు. వీటి వ్యర్థాలను ఎక్కడపడితే అక్కడ పడేస్తుండడంతో ఖాళీ స్థలాలు, డ్రైనేజీలు, రోడ్లపై   కుప్పలుతెప్పలుగా పేరుకుపోతున్నాయి. ఇవి పర్యావరణాన్ని కలుషితం చేస్తున్నాయి. తద్వారా ప్రజలు పలురకాల వ్యాధుల బారిన పడుతున్నారు. ఈ నేపథ్యంలో కేంద్ర, రాష్ట్ర ప్రభుత్వాలు స్పందించి, దశలవారీగా పాలిథిన్‌ వినియోగాన్ని తగ్గించడానికి చర్యలు చేపట్టాయి. ఇందులో భాగంగా తొలుత 40 మైక్రాన్ల కంటే తక్కువ మందం వున్న పాలిథిన్‌ కవర్ల ఉత్పత్తి, అమ్మకం, వినియోగంపై నిషేధం విధించాయి. కానీ నర్సీపట్నం మునిసిపాలిటీలో ఎక్కడా ఇది అమలు కావడం లేదు. పువ్వులు, కూరగాయలు, మాంసం, చేపల దుకాణాలు, టిఫిన్‌ సెంటర్లు, హోటళ్లలో పార్శిళ్లు, కర్రీ పాయింట్లు...ప్రతిచోటా వీటిని వినియోగిస్తున్నారు. ముఖ్యంగా టీ దుకాణాలు, కర్రీ పాయిట్లలో నాసిరకం పాలిథిన్‌ కవర్లలో వేడివేడి టీ, కాఫీ, కూరలు పార్శిల్‌ చేస్తున్నారు.


తూతూమంత్రంగా చర్యలు

గతంలో పలుమార్లు మునిసిపల్‌ అధికారులు ప్లాస్టిక్‌ హోల్‌సేల్‌ వ్యాపారులతో సమావేశాలు నిర్వహించి, 40 మైక్రాన్ల కంటే తక్కువ మందం ఉన్న, నాసిరకం పాలిథిన్‌ సంచులను విక్రయించొద్దని హెచ్చరించారు. ఆ తరువాత కొంతకాలం వీటి అమ్మకాలను తాత్కాలికంగా ఆపేస్తున్న వ్యాపారులు కొద్దిరోజుల తరువాత యథావిధిగా విక్రయిస్తున్నారు. ఎక్కువ మందం గల కవర్లకంటే వీటి ధర తక్కువగా వుండడంతో చిరువ్యాపారులు వీటినే వాడుతున్నారు. కానీ మునిసిపల్‌ అధికారులు పట్టించుకోవడం లేదు. దీనిపై మునిసిపల్‌ కమిషనర్‌ను వివరణ కోరగా...ఈ ఏడాది ఇప్పటివరకు 62 మందిపై కేసులు నమోదుచేసి, రూ.5,100 జరిమానా విధించామని చెబుతున్నారు. 


నెలకు 100 టన్నుల ప్లాస్టిక్‌ వ్యర్థాలు!

మునిసిపాలిటీ పారిశుధ్య సిబ్బంది రోజూ సగటున 30 టన్నుల వరకు చెత్తను ఎత్తి, డంపింగ్‌ యార్డుకు తరలిస్తుంటారు. దీనిలో 3 నుంచి 4 టన్నుల వరకు ప్లాస్టిక్‌/ పాలిథిన్‌ వ్యర్థాలు వుంటాయని ప్రజారోగ్య శాఖ సిబ్బంది అంచనాగా చెబుతున్నారు. ఈ ప్రకారం నెలకు సుమారు 100 టన్నుల వరకు ప్లాస్టిక్‌ వ్యర్థాలు వస్తున్నాయి. ఘనవ్యర్థాల నిర్వహణ కోసం ఏర్పాటుచేసిన కంపోస్ట్‌ యార్డు పూర్తిస్థాయిలో వినియోగంలోకి రాలేదు. దీంతో పట్టణంలో ఎక్కడపడితే అక్కడ ప్లాస్టిక్‌ వ్యర్థాలు పేరుకుపోతున్నాయి.