కరోనా సోకిన కుమారుడు అనుకొని.. తండ్రిని క్వారంటైన్‌కు!

హాంగ్‌కాంగ్: కరోనా మహమ్మారి ప్రపంచాన్ని కబళిస్తున్న ఈ తరుణంలో హాంగ్‌కాంగ్‌లో ఓ వింత ఘటన చోటుచేసుకుంది. ఇక్కడ నివశిస్తున్న ఓ నేపాలీ కుటుంబంలో ఓ వ్యక్తకి కరోనా పాజిటివ్ అని తేలింది. ఈ విషయం తెలుసుకున్న అధికారులు హుటాహుటిన బాధితుడి ఇంటికి చేరుకుని, వారితో రావడానికి మొండికేసిన కరోనా పాజిటివ్ వ్యక్తిని క్వారంటైన్‌కు తరలించారు. కాకపోతే ఇక్కడే ఓ ట్విస్ట్ ఉంది. అదేంటంటే.. వారు క్వారంటైన్‌కు తీసుకెళ్లింది అసలు పేషెంట్‌ను కాదు. పేషెంట్ తండ్రిని. తమ పొరబాటు గ్రహించిన అధికారులు వెంటనే దాన్ని సరిదిద్దుకున్నారు. ‘అసలీ పొరబాటు ఎలా జరిగిందో దర్యాప్తు చేస్తున్నాం. ఈ ఘటన వల్ల ఇబ్బంది పడిన వారందరికీ క్షమాపణలు’ అని ఓ ఉన్నతాధికారి పేర్కొన్నారు.