చవకగా దొరికే క్యాబేజీ తింటే ఇన్ని ఉపయోగాలా!

ఆంధ్రజ్యోతి(18-02-2022)

ప్రశ్న: రంగు రంగుల క్యాబేజీల్లో ఉండే పోషక విలువలు తెలియచేయండి. 

- రాజేశ్‌, అవనిగడ్డ

డాక్టర్ సమాధానం: చౌకధరల్లో యేడాది పొడవునా లభించే కూరల్లో క్యాబేజీ ఒకటి. తాజా క్యాబేజీని పచ్చిగా కానీ, ఉడికించిగానీ తినవచ్చు. అతిగా ఉడక్కుండా ఉండాలంటే క్యాబేజీని వండేటప్పుడు సన్నసెగ మీద వండాలి. క్యాబేజీ అతిగా ఉడికినప్పుడు వచ్చే దుర్వాస వల్లే చాలా మంది ఈ కూరను ఇష్టపడరు. అరకప్పు ఉడికిన క్యాబేజీ (సుమారు 75గ్రా) కేవలం 20 కెలొరీలనే ఇస్తుంది. వందగ్రాముల పచ్చిక్యాబేజీ ఒక రోజుకు అవసరమయ్యే విటమిన్‌- సి లో సగాన్ని, పీచుపదార్థాలలో 10 శాతాన్ని అందిస్తుంది. ఈ పీచుపదార్థాలు మన జీర్ణవ్యవస్థను ఆరోగ్యంగా ఉంచడంతో పాటు, రక్తంలోని కొలెస్ట్రాల్‌ను నియంత్రణలో ఉంచుతాయి.  క్యాబేజీలో లభించే యాంటీఆక్సిడెంట్లు గుండెఆరోగ్యానికి సహాయపడతాయి. ఈ కూర రోగనిరోధకశక్తిని పెంచేందుకు ఉపకరిస్తుంది. ఇందులో ఉండే విటమిన్‌ - కె గాయాల వద్ద రక్తం వేగంగా గడ్డకట్టేందుకు సహాయపడుతుంది. క్యాబేజీలో ఉండే ఇండోల్‌-3- కార్బినాల్‌ అనే రసాయనం యాంటీఆక్సిడెంటుగానూ, క్యాన్సర్‌ నిరోధక ఏజంటుగానూ పనిచేస్తుంది. రొమ్ము, కాలేయం ప్రొస్టేట్‌, ఊపిరితిత్తులు, పెద్ద ప్రేవుల కాన్సర్‌ నివారణలో ఈ రసాయనం కీలక పాత్ర పోషిస్తుంది.

డా. లహరి సూరపనేని

న్యూట్రిషనిస్ట్, వెల్‌నెస్ కన్సల్టెంట్

nutrifulyou.com(పాఠకులు తమ సందేహాలను

sunday.aj@gmail.comకు పంపవచ్చు)