దూసుకొస్తున్న నిసర్గ

• తీవ్ర తుపాను అతి తీవ్రమయ్యే చాన్స్‌
  
• మహారాష్ట్ర, గుజరాత్‌ తీరాలకు ముప్పు
• ముంబై నగరాన్ని ముంచెత్తే ప్రమాదం
• ఆస్పత్రి నుంచి కరోనా రోగుల తరలింపు
• 
  

న్యూఢిల్లీ, జూన్‌ 2: అరేబియా సముద్రంలో ఏర్పడిన వాయుగుండం మంగళవారం మధ్యాహ్నం తీవ్ర తుఫానుగా మారింది. మంగళవారం రాత్రి ఇది అతి తీవ్ర తుఫానుగా మారే అవకాశం ఉంది. బంగ్లాదేశ్‌ ఈ తుఫానుకు నిసర్గ అని నామకరణం చేసింది. తూర్పు మధ్య అరేబియా సముద్రంలో కేంద్రీకృతమైన వాయుగుండం గుజరాత్‌లోని సూరత్‌కు 670 కి.మీ దూరంలో ఉంది. ఇది పెను తుఫానుగా మారి గంటకు 100-110కి.మీ వేగంతో గాలులు వీచే ప్రమాదం ఉంది. ఈ తుఫాను బుధవారం సాయంత్రం పశ్చిమ మహారాష్ట్ర, దక్షిణ గుజరాత్‌ తీరాలను దాటే అవకాశం ఉంది. ఇది ముంబై నగరంపై తీవ్ర ప్రభావం చూపే అవకాశం ఉంది. ఈ నేపథ్యంలో మహారాష్ట్ర, గుజరాత్‌ తీర ప్రాంతాల్లో 33 ఎన్డీఆర్‌ఎఫ్‌ బృందాలు రంగంలోకి దిగాయి.‘‘తుఫానును ఎదుర్కోవడానికి అన్ని రకాలుగా సమాయత్తమవుతున్నాం. ప్రజలు అప్రమత్తంగా ఉండాలి’’ అని ప్రధాని మోదీ ట్వీట్‌ చేశారు. నిసర్గ తుఫాను గనక వస్తే ముంబై చరిత్రలో ఈ మధ్య కాలంలో వచ్చిన మొదటి తుఫాను ఇదే అవుతుంది. 2009 నవంబరులో వచ్చిన ఫ్యాన్‌ తుఫాను నుంచి ముంబైకి త్రుటిలో ప్రమాదం తప్పింది. పాల్ఘర్‌ జిల్లాలో పలు ప్రాంతాలకు చెందిన 21 వేల మందిని ఇప్పటికే సురక్షిత ప్రాంతాలకు తరలించారు.