Texas ఘటన తర్వాత.. New York వాసులను భయపెట్టిస్తున్న షాకింగ్ రిపోర్ట్.. ఈ ఏడాదిలోనే విద్యార్థుల వద్ద..

ఎన్నారై డెస్క్: న్యూయార్క్ సిటీ స్కూళ్లలో చదువుకుంటున్న విద్యార్థుల నుంచి ఈ ఏడాది స్కూల్ భద్రతా అధికారులు ఏకంగా 6 వేల తుపాకులు జప్తు చేసినట్టు తెలిసింది. టెక్సాస్ ఘటన కలకలం నుంచి పూర్తిగా కోలుకోకుముందే వెలుగులోకి వచ్చిన ఈ అంశం అక్కడి తల్లిదండ్రులను కలవర పెడుతోంది. ‘‘స్కూల్‌కు ఓ విద్యార్థి తుపాకీ పట్టుకుని వస్తే.. మరుసటి రోజు మరికొందరు విద్యార్థులు గన్స్‌తో ప్రత్యక్షమవుతారు’’ అని ఓ స్కూల్ భద్రతాధికారి వ్యాఖ్యానించారు. విద్యార్థుల వద్ద తుపాకులే కాకుండా స్టన్ గన్స్, కత్తులు, ఇనుప పైపులు వంటికి కూడా లభ్యమవుతున్నట్టు ఆయన పేర్కొన్నారు. నానాటికీ విస్తృతమవుతున్న ఈ ట్రెండ్ ఆందోళన కలిగిస్తోందని వ్యాఖ్యానించారు. 

మరోవైపు.. పిల్లలు స్కూళ్లకు ఏయే వస్తువులు తీసుకుని వెళుతున్నారో ఓ కన్నేసి ఉంచాలని అధికారులు తల్లిదండ్రులను కోరుతున్నారు. తల్లిదండ్రులే ఈ సమాజానికి తొలి రక్షణ కవచాలు అని వారు వ్యాఖ్యానిస్తున్నారు. అనేక మంది అమాయకులు తుపాకీ సంస్కృతికి బలైపోతున్న ప్రస్తుత తరుణంలో అనేక మంది అమెరికన్లు ఈ దుష్ట సంప్రదాయానికి బ్రేకులు వేయాలంటూ ఉద్యమిస్తున్నారు.