మురుగు పోయేందుకు దారేది?

బండేపల్లి వీధుల్లో పారుతున్న వైనం

మనుబోలు, మార్చి 13 : మురుగు కాలువలు సక్రమంగా లేకపోవడంతో పోయేందుకు దారిలేక మురుగునీరు ఇదిగో ఇలా వీధుల్లో పారుతోంది. బండేపల్లి పంచాయతీలో మురుగు కాలువలు పూడిపోవడం, కొన్ని నెలలుగా మురుగు తీయకపోవడంతో వీధుల్లోకి చేరింది. ఒకప్పుడు ఈ పంచాయతీ మండలంలోనే ఆదర్శగ్రామం. ప్రస్తుతం ఎంపీపీగా ఉన్న గుండాల వజ్రమ్మ ఈ పంచాయతీ నివాసకులు. ఒక్క బండేపల్లి పంచాయతీనే కాదు.. దాదాపు మండలంలోని అన్ని పంచాయతీల్లో ఈ దృశ్యాలు కన్పిస్తున్నాయి. ఇటీవల  రూ.కోట్లతో మురుగు కాలువలను అసవరం లేనిచోట కూడా ఎడాపెడా నిర్మించారు. కాలువల నిర్మాణంలో అధికారుల పర్యవేక్షణ లేకపోవడంతో కాంట్రాక్టర్లు ఇష్టారాజ్యంగా పనులు చేశారు. ఈ క్రమంలో కాలువలోకి చేరిన మురుగు ముందుకు వెళ్లదు.. వెనుకకు రావు.. దీంతో కొద్దిరోజులకే కాలువలు నిండి దోమలకు స్థావరాలుగా మారుతున్నాయి. ఇప్పటికే దోమల ధాటికి మడమనూరు గ్రామం డెంగ్యూ జ్వరాలతో అల్లాడుతోంది. పాలకులు, అధికారులు మురుగు పారుదలపై పట్టించుకోవాలని గ్రామస్థులు  కోరుతున్నారు.