Municipality, Corporation‌ ఎన్నికలకు ఈ నెలాఖరున నోటిఫికేషన్‌

చెన్నై: రాష్ట్రంలో మున్సిపాలిటీలు, కార్పొరేషన్లకు ఎన్నికలు జరిపే నిమిత్తం ఈ నెలాఖరున నోటిఫికేషన్‌ జారీ కానుంది. ప్రస్తుతం పురపాలక సంఘాలు, కార్పొరేషన్లలో వార్డుల విభజన పనులు, వార్డుల రిజర్వేషన్లకు సంబంధించిన పనులన్నీ ముగిశాయి. వాస్తవానికి ఈ నెలారంభంలోనే ఎన్నికల నోటిఫికేషన్‌ జారీ చేయాలని రాష్ట్ర ఎన్నికల అధికారి పళనికుమార్‌ భావించారు. అయితే భారీ వర్షాల కారణంగా ఆ నిర్ణయాన్ని వాయిదా వేసుకున్నారు. ఈ నేపథ్యంలో ఈ నెలాఖరున ఎన్నికల నోటిఫికేషన్‌ జారీ చేయడానికి వీలుగా ఆయన తగు చర్యలు చేపడుతున్నారు. ఈ ఎన్నికలను రెండు విడతలుగా జరుపనున్నారు. ప్రస్తుతం కొత్తగా ఏర్పడిన జిల్లాల్లోనూ, కొత్తగా స్థాయి పెరిగిన మునిసిపాలిటీలు, కార్పొరేషన్లకు ఎన్నికలను నిర్వహించబోమని ఆయన పేర్కొన్నారు. చెన్నై, మదురై, తిరుచ్చి, కోయంబత్తూరు సహా 15 పాత కార్పొరేషన్లతోపాటు మునిసిపాలిటీలకు ఎన్నికలు జరుపుతామన్నారు. ఈ ఎన్నికలకు డీఎంకే, అన్నాడీఎంకే పార్టీలు సిద్ధమవుతున్నాయి. అధికార డీఎంకే పార్టీ కార్పొరేషన్‌, మునిసిపాలిటీ ఎన్నికల్లో పోటీ చేయడానికి ఆసక్తి కనబరుస్తున్న అభ్యర్థుల నుండి దరఖాస్తుల స్వీకరణను కూడా ప్రారంభించింది. ప్రధాన ప్రతిపక్షమైన అన్నాడీఎంకే కూడా ఆశావహుల నుంచి దరఖాస్తులను స్వీకరించడానికి సిద్ధమవుతోంది.