15 ఏళ్ల కూతురికి 40 ఏళ్ల వ్యక్తితో పెళ్లికి ఏర్పాట్లు.. భర్త అడ్డు చెప్పడంతో ఆ భార్య చేసిన దారుణమిది!

15 ఏళ్ల బాలిక 40 ఏళ్ల వ్యక్తితో ప్రేమలో పడింది.. అతడిని పెళ్లి చేసుకోవాలనుకుంది.. అందుకు ఆ బాలిక తల్లి కూడా అంగీకరించింది.. అయితే ఆ బాలిక తండ్రికి మాత్రం ఆ పెళ్లి ఇష్టం లేదు.. తన వయసున్న వ్యక్తిని తన కూతురు వివాహం చేసుకోవడానికి అతను అంగీకరించలేదు.. దీంతో భార్యాభర్తల మధ్య తీవ్ర వాగ్వాదం జరిగింది.. మరుసటి రోజు భర్త శవమై తేలాడు.. బీహార్‌లోని బంధాపూర్‌లో ఈ ఘటన జరిగింది. 

బంధాపూర్‌కు చెందిన సంతోష్ శర్మ, అంజలీదేవి దంపతుల 15 ఏళ్ల కూతురు 45 ఏళ్ల కజిన్ రోషన్‌తో ప్రేమలో పడింది. అతడినే పెళ్లి చేసుకోవాలనుకుంది. అందుకు ఆ బాలిక తల్లి అంజలీ దేవి కూడా అంగీకరించింది. అయితే కూతురు తన కంటే 30 ఏళ్లు పెద్దవాడైన రోషన్‌ను పెళ్లి చేసుకోవడానికి సంతోష్ అంగీకరించలేదు. దీంతో సంతోష్, అంజలి మధ్య ఈ వివాహం విషయమై వాగ్వాదం జరుగుతూ ఉండేది. గత నెల 25న వారిద్దరికీ రహస్యంగా వివాహం చేసేందుకు అంజలీ దేవి ప్రయత్నించింది. అయితే విషయం తెలుసుకున్న సంతోష్ ఆ పెళ్లిని ఆపేశాడు. 

ఈ విషయం తెలుసుకున్న గ్రామ పెద్దలు ఆ వివాహాన్ని వ్యతిరేకించడమే కాకుండా పంచాయితీ నిర్వహించి ఆ కుటుంబానికి 50 వేల రూపాయల జరిమానా విధించారు. దీంతో సంతోష్, అంజలి మధ్య గొడవలు మరింత పెరిగాయి. అనంతరం ఈ నెల 16 నుంచి సంతోష్ అదృశ్యమైపోయాడు. 18వ తేదీన ఆ గ్రామంలోని పొదల మధ్య అతని మృతదేహం లభించింది. దీంతో స్థానికుల ఫిర్యాదు మేరకు పోలీసులు రంగంలోకి దిగారు. తన కొడుకును అతని భార్యే హత్య చేసిందని సంతోష్ తండ్రి ఆరోపిస్తున్నాడు. మృతదేహాన్ని పోస్ట్ మార్టమ్‌కు తరలించిన పోలీసులు కేసు దర్యాఫ్తు చేస్తున్నారు.