కరోనా తీవ్రత వల్ల వృద్ధులు ఇంట్లోనే ఉండాలి: వైద్య అధికారులు

మాస్కో: కరోనా వైరస్ వ్యాప్తి చెందకుండా రష్యా ప్రభుత్వం కఠిన చర్యలు తీసుకుంటోంది. అయినప్పటికీ రోజురోజుకూ దేశంలో కరోనా వైరస్ పాజిటివ్ కేసులు పెరిగిపోతున్నాయి. కరోనా నివారణ చర్యల్లో భాగంగా రష్యా ప్రభుత్వం కీలక నిర్ణయం తీసుకుంది.

రష్యా రాజధాని మాస్కోలో కరోనా వైరస్ పాజిటివ్ కేసులు వేగంగా పెరుగుతుండడంతో వృద్ధులు ఇంట్లో ఉండాలని, యజమానులు వీలైనంత ఎక్కువ మంది రిమోట్‌గా పనిచేయడానికి అనుమతించాలని మాస్కో అధికారులు సిఫారసు చేశారు.

రష్యాలో శుక్రవారం రోజు కొత్తగా 7,212 కొత్త కేసులు నమోదైనట్లు వైద్య అధికారులు వెల్లడించారు. ఇది జూన్ నుంచి రోజువారీ అత్యధిక పెరుగుదల అని అధికారులు పేర్కొన్నారు. మాస్కోలో గత వారంలో కొత్త రోజువారీ అంటువ్యాధుల సంఖ్య పెరగడం ప్రారంభమైందని, రెండు వారాల క్రితం 700 లోపు ఉన్నా శుక్రవారం నుంచి 1,500కు పైగా ఉందని తెలిపారు.