నిర్‌ చింత

ABN , First Publish Date - 2020-02-10T10:59:37+05:30 IST

ఈ నగర వీధుల్లో అంతగా ఎందుకు నడిచానో నా కాలి చెమటతో వీధులన్నీ ఎంతగా తడిసాయో ఇప్పుడు వెదికితే కోట్లమంది చెమటతో తడిసి... ఆరి...

నిర్‌ చింత

ఈ నగర వీధుల్లో 

అంతగా ఎందుకు నడిచానో 

నా కాలి చెమటతో వీధులన్నీ 

ఎంతగా తడిసాయో

 

ఇప్పుడు వెదికితే 

కోట్లమంది చెమటతో 

తడిసి... ఆరి... 

చాకిరేవులా వీధి 


ఆరిపోయిన తేమ మీద 

పేరుకుపోయిన ధూళి దూసర 

అలానే ఎలా ఉంట అక్కడ 

ఎన్నెన్ని రూపాలుగా మారి ఉంటాను 


మారుమూలల్లో 

చీకటి నిండిన గల్లీల్లో 

ఎందుకు నా ఆత్మను తిప్పి 

అలసి అరిగి పోయాను 


అంతగనం 

తెలియని శత్రువునో మిత్రువునో 

వెదుకుతూ 

పోరాడుతూ నగరమంతా 

వెదజల్లుకున్నాను

నను నేను 

మాటగా పోగెయ్యలేని మౌనముగా 


నా కంటే ముందు 

నా తరువాత 

నిర్విరామ 

పాదముద్రల చిత్రాల 

పతానే లేదు ఎక్కడా

శూన్యము నేనెగరేసిన 

రంగుల గాలిపటము 


ఏమి పొందలేని నేను 

ఆ ఖాళీనే పొంది ఉంటాను 


సాధించలేని తనమే 

సాధించిన తనం కావొచ్చు 


ఎత్తిపోయలేనంత ఖాళీలో 

ఈదులాడి 

ఈ ధూళి ఉండలో పొర్లాడి 

నను కన్న పేగుకు దండ వంకీనై ఇంకా


తిరిగి అరిగి 

గుండ్రటి సందల్‌ ముక్క వంకు పీలికైయ్యే

ఉత్థాన పతనాల జాతర వినువీధిలో


ఈ ప్రయాణంలో 

నేను నాకిచ్చుకున్న కానుక 

బహుశా ఈ నిర్‌ చింత నే!

షాజహానా


Updated Date - 2020-02-10T10:59:37+05:30 IST