Ayodhya : నదిలో స్నానమాచరిస్తూ భార్యకు ముద్దు.. అసభ్యతంటూ భర్తపై దాడి

అయోధ్య : సరయూ నది(Sarayu River)లో పవిత్ర స్నానమాచరిస్తూ భార్యను ముద్దాడిన భర్తపై దాడి జరిగింది. ఉత్తరప్రదేశ్‌(Uttarpradesh)లోని అయోధ్య(Ayodhya )లో వెలుగుచూసిన ఈ ఘటనకు సంబంధించిన పూర్తివివరాలు ఈ విధంగా ఉన్నాయి. దంపతులు స్నానం చేస్తున్న ప్రదేశానికి సమీపంలోనే ఉన్న పలువురు వ్యక్తులు తొలుత దుర్భాషలాడడం మొదలుపెట్టారు. ఆగ్రహంగా జంట వద్దకు వెళ్లిన ఓ వ్యక్తి  భర్తను దూరంగా ఈడ్చిపడేశాడు. ఆ తర్వాత భర్తపై దాడికి పాల్పడ్డారు. అయోధ్యలో ఇలాంటి అసభ్యతను సహించబోమంటూ బాధిత వ్యక్తికి హెచ్చరికలు చేశారు.

భర్తకు రక్షణగా నిలబడేందుకు భార్య ప్రయత్నించింది. కానీ ఆమె ప్రయత్నాలు సఫలమవ్వలేదు. మొత్తానికి దంపతులిద్దరినీ నీళ్లలోంచి ఒడ్డుకు పంపించారు. కాగా ఈ ఘటనపై దర్యాప్తు జరపాల్సిందిగా అయోధ్య పోలీసు(Police) అధికారులు ఆదేశాలు జారీ చేశారు. ఈ వ్యవహారంలో చట్టపరమైన చర్యలు తీసుకోవాలని ఆదేశాలు వెలువడ్డాయి. కొత్వాలి అయోధ్య పోలిస్ స్టేషన్ ఇన్‌చార్జి ట్విటర్ వేదికగా ఈ విషయాన్ని తెలిపారు. ఈ ఘటనకు సంబంధించిన వీడియో సోషల్ మీడియా ప్లాట్‌ఫామ్స్‌పై వైరల్‌గా మారింది.

కాగా గంగా నది(River Ganga) ఉపనదుల్లో సరయూ నది ఒకటి. హిందువులు(Hindus) ఈ నదిని పవిత్రమైనదిగా విశ్వసిస్తారు. రాముడి జన్మభూమి అయోధ్య ఈ నది తీరాన ఉన్న విషయం తెలిసిందే.