గుడి గంటలు మోగనున్నాయ్... మమత ప్రకటన

కోల్‌కతా: దేశవ్యాప్తంగా అమల్లో ఉన్న లాక్‌డౌన్ 4.0 ఈ నెలాఖరుతో ముగియనున్న నేపథ్యంలో జూన్ 1వ తేదీ నుంచి రాష్ట్రంలోని అన్ని ప్రార్థనా స్థలాలను తిరిగి తెరవనున్నట్టు పశ్చిమబెంగాల్ ముఖ్యమంత్రి మమతా బెనర్జీ ప్రకటించారు. దీంతో ప్రార్థనా స్థలాలు తెరువనున్నట్టు ప్రకటించిన మొదటి రాష్ట్రంగా పశ్చిమబెంగాల్ నిలువనుంది. జూన్ 1 నుంచి మరో 15 రోజుల పాటు కేంద్రం మరో విడత (5.0) లాక్‌డౌన్ పొడిగించే అవకాశం ఉందంటూ ప్రచారం జరుగుతున్న తరుణంలో మమత ప్రకటన ప్రాధాన్యం సంతరించుకుంది.

8 నుంచి ఫుల్ స్వింగ్...

జూన్ 8వ తేదీ నుంచి ప్రభుత్వ, ప్రైవేటు రంగ సంస్థలన్నీ 100 శాతం పూర్తి సామర్థ్యంతో తెరవాలని కూడా పశ్చిమబెంగాల్ సర్కార్ నిర్ణయించింది. 'గత రెండు నెలల్లో కోవిడ్-19 వ్యాప్తిని విజయవంతంగా అదుపు చేశాం. బయట నుంచి జనం రావడంతో ఇప్పుడు కేసులు పెరుగుతున్నాయి' అని మమతా బెనర్జీ పేర్కొన్నారు. దీనికి ముందు, సామాజిక దూరం నిబంధనలతో ప్రార్థనా స్థలాలు తెరుచుకునేందుకు అనుమతించాలంటూ ప్రధాని మోదీకి మమతా బెనర్జీ లేఖ రాశారు.