ప్రత్యేక వృత్తిగా ఆ ఉద్యోగం.. H-1B ఉద్యోగులపై ఆధారపడే కంపెనీల హర్షం!
ABN , First Publish Date - 2021-10-30T19:23:42+05:30 IST
అగ్రరాజ్యం అమెరికా దేశంలోని కంపెనీలకు విదేశీ నిపుణుల నియామకాల కోసం హెచ్-1బీ వీసాలు మంజూరు చేస్తుందన్న విషయం తెలిసిందే.
వాషింగ్టన్: అగ్రరాజ్యం అమెరికా దేశంలోని కంపెనీలకు విదేశీ నిపుణుల నియామకాల కోసం హెచ్-1బీ వీసాలు మంజూరు చేస్తుందన్న విషయం తెలిసిందే. ఇలా విదేశీ నిపుణులకిచ్చే హెచ్-1బీ వీసాలలో 'మార్కెట్ రీసెర్చ్ ఎనలిస్ట్' ఉద్యోగాన్ని ప్రత్యేక వృత్తిగా పరిగణిస్తూ యునైటెడ్ స్టేట్స్ పౌరసత్వం, ఇమ్మిగ్రేషన్ సేవల(యూఎస్సీఐఎస్) విభాగం కుదుర్చుకున్న ఒప్పందాన్ని కాలిఫోర్నియా నార్త్ డిస్ట్రిక్ట్ కోర్టు ఆమోదించింది. దీంతో హెచ్-1బీ ఉద్యోగులపై ఆధారపడే కంపెనీలు హర్షం వ్యక్తం చేస్తున్నాయి. గతంలో అమెరికాలోని ఉద్యోగాలతో కూడిన ఓ జాబితాను డిపార్ట్మెంట్ ఆఫ్ లేబర్స్ బ్యూరో ఆఫ్ లేబర్ స్టాటిస్టిక్స్ రూపొందించింది.
అయితే, ఈ జాబితాలో 'మార్కెట్ రిసెర్చ్ ఎనలిస్ట్' ఉద్యోగం లేనందున ఆ ఉద్యోగాన్ని ప్రత్యేక వృత్తిగా పరిగణించలేమని యూఎస్సీఐఎస్ తేల్చి చెప్పింది. దీంతో హెచ్1బీ ఉద్యోగులపై ఆధారపడే కంపెనీలకు ఎదురుదెబ్బ తగిలింది. తాజాగా కాలిఫోర్నియా నార్త్ డిస్ట్రిక్ట్ కోర్టు ఆమోదించిన ఒప్పందం ప్రకారం.. గతంలో కొట్టివేసిన తమ హెచ్1బీ పిటిషన్లను యూఎస్సీఐఎస్ పునరుద్ధరించేందుకు కంపెనీలు విజ్ఞప్తి చేసుకునే వీలు ఏర్పడింది. ఈ ఒప్పందంతో వేలాది అగ్రరాజ్యం కంపెనీలకు లబ్ధి చేకూరునుంది. ఇక అగ్రరాజ్యం ప్రతియేటా 65వేల రెగ్యూలర్, 20వేల మాస్టర్ క్యాప్ హెచ్-1బీ వీసాలు మంజూరు చేస్తుంది. ఇలా విదేశీ నిపుణుల నియామకాల కోసం మొత్తం 85వేల హెచ్-1బీ వీసాలు ఇస్తుంది. వీటిలో భారత్, చైనా నుంచే అత్యధికంగా ఈ వీసాలు పొందడం జరుగుతుంది.
