ఎన్నికలంటే Bjpకి భయం
ABN , First Publish Date - 2022-07-21T17:58:57+05:30 IST
ఎన్నికలంటే అధికార బీజేపీకి భయం పట్టుకుందని అందుకే వీటిని వాయిదా వేయించేందుకు సాకులు వెతుకుతోందని కాంగ్రెస్‌ ఆరోపించింది.
- వాయిదాకు సాకులు: Congress
బెంగళూరు, జూలై 20 (ఆంధ్రజ్యోతి): ఎన్నికలంటే అధికార బీజేపీకి భయం పట్టుకుందని అందుకే వీటిని వాయిదా వేయించేందుకు సాకులు వెతుకుతోందని కాంగ్రెస్‌ ఆరోపించింది. కేపీసీసీ అధ్యక్షుడు డీకే శివకుమార్‌ బెంగళూరులో బుధవారం మీడియాతో మాట్లాడుతూ.. జిల్లా పంచాయతీ, తాలూకా పంచాయతీ, బీబీఎంపీ ఎన్నికలు తక్షణం నిర్వహించేలా ప్రభుత్వానికి సుప్రీంకోర్టు తగిన మార్గదర్శకాలు చేస్తుందన్న ఆశాభావాన్ని వ్యక్తం చేశారు. జీఎస్టీ బాదుడుతో ప్రజల్లో తీవ్ర వ్యతిరేకత నెలకొని ఉందని, ప్రస్తుతం ఎన్నికలకు వెళితే ప్రతికూల ఫలితాలు తప్పవని బీజేపీ భయపడుతోందన్నారు. మధ్యప్రదేశ్‌లోనూ పన్నుపోటు కారణంగానే ప్రజల్లో వ్యతిరేకత ఏర్పడి అక్కడ ఎదురుదెబ్బలు తగిలిన సంగతిని గుర్తు చేశారు.
దేశవ్యాప్తంగా సామాన్య ప్రజల బతుకును దుర్భరంగా మార్చేసిన బీజేపీ ఏ ముఖం పెట్టుకుని ఎన్నికలకు వెళుతుందని ఆయన ప్రశ్నించారు. జీఎస్టీ వ్యవహారంపై ప్రజల్లోకి మరింత దూకుడుగా వెళతామని తద్వారా కేంద్ర, రాష్ట్ర ప్రభుత్వాల బండారాన్ని బయటపెడతామన్నారు. ఇప్పటికే పెట్రోల్‌, డీజిల్‌ ధరలు సెంచరీ దాటేయగా గ్యాస్‌ ధర రూ.2వేల వైపు వడివడిగా పరుగులు తీస్తోందని ఎద్దేవా చేశారు.
