Sep 28 2021 @ 21:19PM

‘లవ్ స్టోరి’ ఊరకే హిట్ అవలేదు: కింగ్ నాగార్జున

యువసామ్రాట్ నాగ చైతన్య, సాయిపల్లవి జంటగా సెన్సిబుల్ దర్శకుడు శేఖర్ కమ్ముల దర్శకత్వంలో రూపొందిన చిత్రం ‘లవ్ స్టోరి’. సెప్టెంబర్ 24న ప్రేక్షకుల ముందుకొచ్చిన ఈ చిత్రం అన్ని వర్గాల ప్రేక్షకులను మెప్పించి సూపర్ హిట్ టాక్ సొంతం చేసుకుంది. ఈ నేపథ్యంలో మ్యాజికల్ సక్సెస్ మీట్ కార్యక్రమాన్ని నిర్వహించింది చిత్రయూనిట్. ఈ కార్యక్రమంలో చిత్ర బృందంతో పాటు కింగ్ నాగార్జున, దర్శకుడు సుకుమార్, నిర్మాతలు కేఎస్ రామారావు, డి సురేష్ బాబు తదితరులు అతిథులుగా పాల్గొన్నారు. 


ఈ సందర్భంగా హీరో నాగార్జున మాట్లాడుతూ.. ‘‘తెలుగు ప్రేక్షకులందరికీ నమస్కారం. ఈ కార్యక్రమానికి వచ్చిన పెద్దలందరికీ నమస్కారం. నాకు లవ్ స్టోరి సక్సెస్ మీట్ కన్నా ఇది హ్యూమానిటీ సక్సెస్ మీట్‌లా అనిపిస్తోంది. మార్చి 2020 నుంచి వైరస్‌తో పోరాడుతూనే ఉన్నాం.. ఏడాదిన్నర గడిచిపోయింది. ఒక వేవ్‌లో బయటపడ్డాం అనుకున్నాం కానీ రెండో వేవ్ వచ్చి అణిచివేసింది. ఇప్పుడిప్పుడే బయటపడుతున్నాం. 208 రోజుల తర్వాత తెలంగాణలో కోవిడ్ డెత్స్ లేవని తెలిసి సంతోషించాను. ఏపీతో పాటు దేశంలోనూ కరోనా తగ్గుతోంది. కాబట్టి మనం దాన్ని ముందు సెలబ్రేట్ చేసుకోవాలి. కేంద్ర, తెలుగు రాష్ట్రాల ప్రభుత్వాలు కరోనాతో బాగా పోరాడాయి. తెలంగాణ మీద కాస్త కనికరం చూపించింది కానీ ఏపీలో ఉధృతి ఎక్కువగా ఉండేది. కానీ ఇవాళ ఆ వైరస్ నుంచి బయటపడ్డాం. ప్రజల్ని కాపాడటమే ప్రభుత్వాల పని. చాలా రాష్ట్రాల్లో థియేటర్స్ తెరవలేదు. తెలంగాణలో థియేటర్స్ తెరిచారు. ఏపీలో వైరస్ దృష్ట్యా పూర్తిగా తెరవలేదు. ఈ పోరాటంలో ఆరోగ్య కార్యకర్తల నుంచి ముఖ్యమంత్రుల వరకు అందరికీ థాంక్స్ చెబుతున్నా. 


‘లవ్ స్టోరి’ సక్సెస్ గురించి మాట్లాడాలంటే ఎక్కడి నుంచి మొదలుపెట్టాలో తెలియడం లేదు. ఈ సినిమా తెలుగు చిత్ర పరిశ్రమకే కాదు మొత్తం దేశ సినిమా పరిశ్రమకే ఉత్సాహాన్ని ఇస్తోంది. లవ్ స్టోరి ఫస్ట్ డే వరల్డ్ వైడ్ షేర్ 7 కోట్ల రూపాయలు. ఒక మంచి సినిమా ఇస్తే థియేటర్లకు వస్తామని తెలుగు ప్రేక్షకులు సిద్ధంగా ఉన్నారు. లవ్ స్టోరి ఒక నాంది. దసరా, సంక్రాంతికి సినిమాలు రిలీజ్ చేసుకునేందుకు ధైర్యం వచ్చింది. ప్రతి ఫిల్మ్ మేకర్ లవ్ స్టోరి విజయం వల్ల సంబరాలు చేసుకున్నారు.


దర్శకుడు శేఖర్ కమ్ముల నుంచి మనం సంస్కారం నేర్చుకోవాలి. ఆయన పేరుపేరునా టీమ్ అందరినీ పిలిచారు. మేము మర్చిపోతాం. ఆయన మానవత్వం సూపర్బ్. శేఖర్ కమ్ముల చాలా సెన్సిటివ్ డైరెక్టర్. ఆయన థీమ్స్ అన్నింటిలో సెన్సిటివిటీ ఉంటుంది. కానీ అది సరిపోదు. దాన్ని కమర్షియల్ ఎలిమెంట్స్ తో బ్యాలెన్స్ చేసి తీయాలి. శేఖర్ కమ్ముల అది నేర్చుకున్నాడు. లవ్ స్టోరి ఊరకే హిట్ అవలేదు. అన్ని ఎలిమెంట్స్ కలిపి తెరకెక్కించారు. వన్ గర్ల్ ముందుకొచ్చి తన సమస్యను చెప్పగలిగితే చాలు లవ్ స్టోరికి సార్థకత వచ్చినట్లే. సినిమాలో ప్రతి సన్నివేశం బ్యూటిఫుల్‌గా ఉంది. భారీ సెట్టింగ్‌లు వద్దు.. ఒక టెర్రస్ చాలు మంచి సినిమా చేసేందుకు అని నిరూపించారు శేఖర్ కమ్ముల. క్యారెక్టర్స్‌తో ఎమోషన్ కనెక్ట్ చేస్తే చాలు సినిమా విజయం సాధిస్తుందని శేఖర్ కమ్ముల ప్రూవ్ చేశారు. నాకు ఇలాంటి ఇన్సిడెంట్స్ చదవడం కూడా ఇష్టం ఉండదు. కానీ అలాంటి అంశాలను శేఖర్ కమ్ముల చూపించిన విధానం సూపర్బ్. నేను సినిమా చూసి రెండు మూడు రోజులు అదే ఎమోషన్‌లో ఉండిపోయాను.


నారాయణ దాస్ నారంగ్‌గారికి నాన్నగారు ఏఎన్నార్ తో చాలా అనుబంధం ఉండేది. ఆయన నాతో సినిమా తీయకుండా చైతూతో సినిమా నిర్మించి సూపర్ హిట్ చేశారు. ఆయనను చూస్తుంటే నాన్నను చూసినట్లే ఉంటుంది. సునీల్ నా ఫ్రెండ్ చాలా టెన్షన్ పడ్డారు సినిమా రిలీజ్ డేట్ విషయంలో. కానీ మీరు కరెక్ట్ డేట్ సెలెక్ట్ చేసుకున్నారు. నేను మిమ్మల్నందరినీ కంగ్రాట్స్ చేస్తున్నాను. పవన్ చాలా మంచి మ్యూజిక్ ఇచ్చారు. ఏఆర్ రెహమాన్ గారి శిష్యుడు అని విన్నాను. అందుకే వందలాది మిలియన్ వ్యూస్ వచ్చాయి. వెల్ డన్ పవన్. సుద్దాల సాహిత్యం, మంగ్లీ పాటలు పాడిన తీరు బ్యూటిఫుల్‌గా ఉంది. సినిమాకు పనిచేసిన చాలా మంది గురించి మాట్లాడాలి. 

సాయి పల్లవి..మీ తాతగారికి అన్నమయ్య సినిమానే చూపిస్తూ ఉండు. సాయి పల్లవి వండర్ ఫుల్ యాక్ట్రెస్. ఆమె డాన్స్ చేస్తుంటే సమ్ స్పిరిట్ కనిపిస్తుంటుంది. ఆమె చుట్టూ వంద సాయి పల్లవిలు డాన్స్ చేస్తున్నట్లు ఉంటుంది. ఆమె కాళ్లు గాలిలో తేలినట్లు ఉంటాయి. నువ్వు ఏ క్యారెక్టర్ చేసినా ఆ మ్యాజిక్ కనిపిస్తుంటుంది. నీకు అది గొప్ప గిఫ్ట్. పేరు పేరునా నటీనటులు, టీమ్ మెంబర్స్ అందరికీ గాడ్ బ్లెస్ యూ. లవ్ స్టోరి ఒక క్లాసిక్ ఫిల్మ్. ఇలాంటివి అప్పుడప్పుడూ వస్తుంటాయి. కొడుకు గురించి ఏం చెప్పుకుంటాను. చైతన్యను చూస్తుంటేనే కడుపు నిండిపోతుంది. ఈ సినిమా చూశాక ఇంకా సంతోషమేసింది. యాక్టర్ అండ్ స్టార్ ఇవి రెండు డిఫరెంట్ పదాలు. చైతూను ఒక స్టార్ యాక్టర్‌గా తయారు చేశాడు శేఖర్ కమ్ముల. అతన్ని న్యూ జర్నీలో తీసుకెళ్లావ్. నాన్నా.. నువ్వు చాలా ఫెంటాస్టిక్‌గా నటించావు. నేను నవ్వేలా, ఏడ్చేలా చేశావ్ సినిమాలో. ప్రేమనగర్ రిలీజ్ అయి 50 ఏళ్లవుతోంది. సేమ్ డేట్‌కు లవ్ స్టోరి రిలీజ్ అయ్యింది. ప్రేమనగర్ టైమ్‌లోనూ సైక్లోన్ ఉన్నా, నాన్నగారి కెరీర్‌లో బిగ్గెస్ట్ హిట్ అయ్యింది. తుఫాన్, కొవిడ్, సైక్లోన్‌తో పోరాడి లవ్ స్టోరి గొప్ప విజయాన్ని సాధించింది. రెండు తెలుగు రాష్ట్రాల ప్రభుత్వాలు ఎప్పుడూ మమ్మల్ని మంచి చూపుతో చూశాయి. తెలుగు  ప్రేక్షకులు సినిమాను ప్రేమిస్తారు. ఇకపైనా ఇలాగే సపోర్ట్ చేస్తారని కోరుకుంటున్నాను. మనం మాస్క్‌లు తీసేసి హాయిగా కలిసి ఉండాలని, ఆ రోజు రావాలని కోరుకుంటున్నా..’’ అన్నారు.