మృత్యువుతో పోరాడలేక.. చిన్నారి అన్విక మృతి

ద్వారకాతిరుమల, జూలై 3 : చిన్నారి అన్విక ఇక లేదన్న వార్త కుటుంబసభ్యులతో పాటు పలువురిని  కలచివేసింది. విజయవాడ ఆసుపత్రి నుంచి ఆదివారం ఉదయం చిన్నారి మృతదేహాన్ని స్వగ్రామమైన మండలంలోని జి కొత్తపల్లికి తీసుకు రాగా వందలాది మంది తరలివెళ్లారు. బొండాడ వెంకన్నబాబు, జంగా కృష్ణారెడ్డితో పాటు పలువురు చిన్నారి కుటుంబాన్ని పరామర్శించారు. గత నెల 5న స్థానిక చర్చి వద్ద ఆడుకుంటుండగా అక్కడ భోజనాల కోసం సిద్ధం చేసిన మరుగుతున్న సాంబారు పాత్రలో పడింది. తీవ్రంగా గాయాలపాలై దాదాపు 28 రోజులపాటు మృత్యువుతో పోరాడిన చిన్నారి అన్విక (5) శనివారం రాత్రి మృతి చెందింది. చిన్నారి పరిస్థితిపై గత నెల 8న ఆంధ్రజ్యోతిలో ‘చిన్నారి ప్రాణం నిలుపరూ’ శీర్షికన కథనం వెలుబడింది. పలువురు దాతలు స్పందించారు. స్థానిక ఎమ్మెల్యే తలారి వెంకట్రావు కృషితో ప్రభుత్వం సీఎం రిలీఫ్‌ఫండ్‌ నుంచి రూ.15 లక్షలు నిధులు మంజూరు చేసింది. ఇన్ని ప్రయత్నాలు జరిగినా పాప దక్కకపోవడంతో ఆ కుటుంబం కన్నీరుమన్నీరవుతోంది.