Advertisement
Advertisement
Latest Telugu News
Advertisement
Published: Mon, 03 Jan 2022 00:49:09 IST

ఇన్‌స్టాగ్రామ్‌

twitter-iconwatsapp-iconfb-icon
ఇన్‌స్టాగ్రామ్‌

బిగ్‌బజార్లో ఎదురుపడ్డప్పుడు 

అద్దం మురిసే ముఖాలతో 

     పలకరించుకుంటున్నాం-

సభల్లో సమావేశాల్లో 

ఈవెంట్లవారీగా 

     హర్షద్‌ మెహతా తోబుట్టువుల్లా

కలుసుకుంటూనే వున్నాం-


బర్త్‌ డేలకూ

వివాహ వేడుకలకూ గృహ ప్రవేశాలకూ

రిటర్న్‌ గిఫ్ట్‌లు గట్రా తీసుకొని వీఐపీల్లా

ఎంతదూరమైనా వెనకో ముందో 

     వెళ్లొస్తూనే వున్నాం-

సిసింద్రీలను చైల్డ్‌ కేర్‌ సెంటర్లలో

పూల బాల్యాన్ని కార్పొరేట్‌ హాస్టళ్లలో

వృద్ధుల దేశాన్ని

ఓల్డేజి హోముల్లో వస్తువుల్లా దమాయించి

డీమార్ట్‌ మిగులును

యుట్యూబ్‌ వంటకాల్లో షేర్‌ చేస్తూ

ఆండ్రాయిడ్‌ ఫోన్లతో 

     ఆనందమానందంగా బతికేస్తున్నాం-


ఇదివరకటి కంటే

రోజులిప్పుడు ఫక్తు స్మార్టే మరి

ఖర్చులకు పెట్టుడులకూ వెనుకాడేదేం లేదు-

ప్రాపర్టీ ప్రదర్శనలో ఎల్లక

మునుపటి వలె కుమిలిపోవుడూ లేదు-

కేటరింగ్‌ పుష్పగుచ్ఛాల ఆహ్వానం

టాపప్‌ జ్ఞాపికల వీడ్కోలు 

     అంతా ఆన్‌లైన్‌ మార్కెటింగ్‌

క్రెడిట్‌కార్డుల సస్యశ్యామలసామ్రాజ్యం-


ఏ ఇంటి  

గేటు తీసినా అంతస్తులపైకి విరగబాకిన 

కలోనియల్‌ మనీప్లాంట్‌-

ఏ జంట ఆల్బమ్‌ చూసినా

గోవా సౌందర్యాన్ని తలదన్నే రిసార్ట్‌స్‌

ఆసమ్‌ స్నాప్‌షాట్స్‌-

డాలర్‌ గుడ్లు పొదిగే అబ్రాడ్‌ కలల తెరకు

భూమిని విమానాల్లో మడతపెట్టే 

     ఓటీటీ సింఫనీ మీద

తీరికలేని ఎలైట్‌ ప్రేమలు-


ఒత్తిడికీ విత్తానికీ మధ్య 

జీవితం ఒక ఇమ్మెచ్యూర్‌ ఇన్సూరెన్స్‌ బాండ్‌-

ఇవ్వడానికీ

తీసుకోవడానికీ నడుమ 

     బంధాలూ అనుబంధాలే కాదు

దాంపత్యం సైతం

ఒక అన్‌పోస్టెడ్‌ మ్యూచివల్‌ ట్వీట్‌-

ఇప్పుడు

ఎవరూ ఎవరికీ పూచీకత్తు కాదు

ఇన్‌స్టాగ్రామ్‌లో ఏదీ దేనికీ కోరిలేటెడ్‌ కాదు

ప్యాకేజీని బట్టే వర్క్‌ ఇన్‌ ఫేవర్‌-


ఇక్కడ

కేవలం కరెన్సీ మాత్రమే మాట్లాడుతుంది

జనాల కంతలకు

ఫాస్టాగ్‌ సూత్రమే కట్టుబాటై వుంది-


నాగరికత చౌరస్తాలో

మనిషిని ట్రేస్‌ చేసేట్టూ లేదు

యాంత్రిక యాతనల్లో

మనసుకు ఏ శ్రుతీ కుదిరేట్టూ లేదు.

బెల్లి యాదయ్య

Advertisement
ABN Youtube Channels ABN Indian Kitchen ABN Entertainment Bindass NewsBindass News ABN Something Special ABN Devotional ABN Spiritual Secrets ABN Telugu ABN Telangana ABN National ABN International
Advertisement
OpinionPoll
Advertisement
Copyright © and Trade Mark Notice owned by or licensed to Aamoda Publications PVT Ltd.
Designed & Developed by AndhraJyothy.