వినాయక నిమజ్జనంపై ఈనెల 6న ఆదేశాలు: హైకోర్టు

హైదరాబాద్: నగరంలోని హుస్సేన్‌సాగర్‌లో వినాయక నిమజ్జనంపై బుధవారం హైకోర్టులో విచారణ జరిగింది. హుస్సేన్ సాగర్‌లో నిమజ్జనం నిషేధించాలంటూ న్యాయవాది వేణుమాధవ్ పిటిషన్​పై హైకోర్టులో వాదనలు జరిగాయి. నిమజ్జనం సందర్భంగా ఆంక్షలు, నియంత్రణ చర్యలు సూచించాలని న్యాయస్థానం ఆదేశించింది. ప్రభుత్వం, గణేష్ ఉత్సవ సమితి, పిటిషనర్ నివేదికలు సమర్పించాలని తెలిపింది. కొవిడ్ పరిస్థితులు, కాలుష్యాన్ని దృష్టిలో ఉంచుకోవాలని ధర్మాసనం సూచించింది. ప్రజల సెంటిమెంట్​ను గౌరవిస్తూనే.. ప్రస్తుత పరిస్థితులు కూడా చూడాలని పేర్కొంది. ఎక్కడికక్కడ స్థానికంగానే నిమజ్జనం చేస్తే బాగుంటుందని హైకోర్టు సూచనలు చేసింది. సామూహిక నిమజ్జనంతో హుస్సేన్ సాగర్ దెబ్బతినకుండా చూడాలని తెలిపింది. అందరి సూచనలు పరిగణనలోకి తీసుకొని ఈ నెల6న తగిన ఆదేశాలు జారీ చేస్తామని హైకోర్టు స్పష్టం చేసింది.