ఊహాచిత్రం గీయగలరా!
ABN , First Publish Date - 2020-06-28T05:30:00+05:30 IST
పోలీసులు నేరస్థుల ఊహాచిత్రాలు గీయించడం సినిమాల్లో చూసే ఉంటారు కదా! వారిని చూసిన వ్యక్తి పోలికలు చెబుతూ ఉంటే ఆర్టిస్టు బొమ్మ వేస్తుంటారు. ఇదిగో... ఈ గేమ్ కూడా అలాంటిదే...
పోలీసులు నేరస్థుల ఊహాచిత్రాలు గీయించడం సినిమాల్లో చూసే ఉంటారు కదా! వారిని చూసిన వ్యక్తి పోలికలు చెబుతూ ఉంటే ఆర్టిస్టు బొమ్మ వేస్తుంటారు. ఇదిగో... ఈ గేమ్ కూడా అలాంటిదే. ఈ ఆట మీ ఊహాశక్తిని పెంచుతుంది. ఆడుకోవడానికి ఇద్దరుంటే సరిపోతుంది.
కావలసినవి:
- కొన్ని తెల్ల పేపర్లు
- పెన్సిల్ లేదా స్కెచ్ పెన్నులు
- కొన్ని బొమ్మలు
ఇలా చేయాలి...
- ఇద్దరూ ఒక దగ్గర కూర్చోవాలి. ఎదురెదురుగా కాకుండా, తలా ఒకవైపు తిరిగి కూర్చోవాలి.
- ఎవరు బొమ్మ గీయాలి, ఎవరు బొమ్మ గురించి వివరించాలి అనేది ముందుగానే నిర్ణయించుకోవాలి.
- ఏ బొమ్మ తీసుకుంటున్నారో, గీసే వ్యక్తికి తెలియకూడదు. ఒకరు ఏదైనా చిత్రాన్ని చేతుల్లోకి తీసుకుని దాని గురించి వివరిస్తూ ఉండాలి. అంటే బొమ్మ గీసేందుకు అవసరమైన హింట్స్ ఇస్తుండాలి. అయితే ఆ బొమ్మ పేరు బయటకు చెప్పకూడదు.
- ఈ గేమ్ వల్ల పిల్లల్లో ఊహాశక్తి పెరుగుతుంది. డ్రాయింగ్ స్కిల్స్ పెరుగుతాయి.