గంగా నువు ప్రవహించెదవేల?
ABN , First Publish Date - 2021-05-31T05:55:41+05:30 IST
విస్తారపు తీరాలమ్మెట బ్రతుకీడ్చే జనమెందుకు చేస్తున్నరు హాహాకారాలు సదా నిశ్శబ్దంగా ఓ గంగా నువు ఓ గంగా నువు ప్రవహించెదవేల?...
విస్తారపు తీరాలమ్మెట
బ్రతుకీడ్చే జనమెందుకు
చేస్తున్నరు హాహాకారాలు
సదా నిశ్శబ్దంగా ఓ గంగా నువు
ఓ గంగా నువు ప్రవహించెదవేల?
నైతికత నశించిపోయె, మానవత భ్రష్టుపట్టె
నిర్లజ్జగ నువు ప్రవహించెదవేల?
చలించమని చరిత్ర హూంకరిస్తోంది
ఓ గంగా ప్రవాహమా
ఈ నిర్బల జనావళిని
సబల, సంగ్రమ యోధులుగా
కోపోగ్ర విప్లవ కారులుగా
పూనుకుని చేయవెందుకని?
చదువులేని అక్షరహీనులు,
కడుపు నిండని అసంఖ్యాకులు
చూడలేవా కళ్ళులేవా ?
చలించమని చరిత్ర హూంకరిస్తోంది
ఓ గంగా ప్రవాహమా
ఈ నిర్బల జనావళిని
సబల, సంగ్రమ యోధులుగా
కోపోగ్ర విప్లవ కారులుగా
పూనుకుని చేయవెందుకని?
స్వార్థంలో నిలువెల్లా కుంగిపోయిన మనిషి
ఏ విలువా మిగలక కుళ్లిన సమాజం
ఈ నిస్త్రాణ సమాజ శవాన్ని పట్టించుకోవెందుకని?
చలించమని చరిత్ర హూంకరిస్తోంది
ఓ గంగా ప్రవాహమా
ఈ నిర్బల జనావళిని
సబల, సంగ్రమ యోధులుగా
కోపోగ్ర విప్లవ కారులుగా
పూనుకుని చేయవెందుకని?
నీ తేజస్సు ఎలా తరిగిపోయింది?
నీ మండే చైతన్యం ఆరిపోయింది
ప్రాణులకో ప్రేరణ పూరించలేవా?
అవని, కురుక్షేత్రంలో రేగిన యుద్ధరవాలు
గంగమ్మా, ఈ నవభారతంలో
ఎక్కడమ్మా భీష్ముని పోలిన సమరవీరులు
విస్తారపు తీరాలమ్మెట
బ్రతుకీడ్చే జనమెందుకు
చేస్తున్నరు హాహాకారాలు
సదా నిశ్శబ్దంగా ఓ గంగా నువు
ఓ గంగా నువు ప్రవహించెదవేల?
(భూపెన్ హజారికా ‘గంగా బెహతీహై క్యోం’కి తెలుగు అనువాదం)
అక్కిరాజు భట్టిప్రోలు
98665 51263