uttarpradesh సీఎం యోగిపై మాజీ ఉపాధ్యాయుడి పోటీ
ABN , First Publish Date - 2022-02-05T14:13:08+05:30 IST
అవినీతికి వ్యతిరేకంగా పోరాడుతున్న మాజీ ఉపాధ్యాయుడు విజయ్ సింగ్ సాక్షాత్తూ యూపీ సీఎం అయిన గోరఖ్పూర్ భాజపా అభ్యర్థి యోగి ఆదిత్యనాథ్ పై ఎన్నికల్లో పోటీ చేస్తానని ప్రకటించారు...
గోరఖ్పూర్(ఉత్తరప్రదేశ్): అవినీతికి వ్యతిరేకంగా పోరాడుతున్న మాజీ ఉపాధ్యాయుడు విజయ్ సింగ్ సాక్షాత్తూ యూపీ సీఎం అయిన గోరఖ్పూర్ భాజపా అభ్యర్థి యోగి ఆదిత్యనాథ్ పై ఎన్నికల్లో పోటీ చేస్తానని ప్రకటించారు. అవినీతికి వ్యతిరేకంగా భూ మాఫియాపై చర్యలు తీసుకోవాలని కోరుతూ మాజీ ఉపాధ్యాయుడైన విజయ్ సింగ్ ముజఫర్నగర్లో 26 ఏళ్లుగా ధర్నా చేస్తున్నాడు.తాను గోరఖ్పూర్ అర్బన్ స్థానం నుంచి యోగి ఆదిత్యనాథ్పై పోటీ చేస్తానని, కర్హాల్ అసెంబ్లీ నియోజకవర్గంలో అఖిలేష్ యాదవ్కు వ్యతిరేకంగా ప్రచారం చేస్తానని విజయ్ సింగ్ చెప్పారు. విజయ్ సింగ్ అవినీతి వ్యతిరేక ఉద్యమకారుడు. పశ్చిమ ఉత్తరప్రదేశ్లో వేలాది ఎకరాల భూమిని ఆక్రమించిన ల్యాండ్ మాఫియాపై చర్యలు తీసుకోవాలని కోరుతూ ముజఫర్నగర్లో 26 ఏళ్లుగా ధర్నా చేస్తున్నాడు.
‘‘నేను అసెంబ్లీ ఎన్నికల్లో పోటీ చేస్తానని ప్రకటించాను. నేను ఫిబ్రవరి 9న గోరఖ్పూర్ అర్బన్ స్థానం నుంచి పోటీకి నామినేషన్ దాఖలు చేస్తాను’’ అని విజయ్ సింగ్ చెప్పారు.‘‘గత 26 ఏళ్లుగా ఉత్తరప్రదేశ్ను పాలించిన ఏ పార్టీ కూడా అవినీతికి వ్యతిరేకంగా, భూ మాఫియాపై చర్యలు తీసుకోవడంలో సీరియస్గా లేదని ప్రజలకు తెలియజేసేందుకు నేను ఎన్నికల్లో పోటీ చేస్తున్నాను’’ అని విజయ్ సింగ్ వెల్లడించారు.