Advertisement
Advertisement
Abn logo
Advertisement
Dec 5 2021 @ 02:38AM

కారులా.. విమానాన్నే నెట్టేశారిలా..!

ఖాట్మండూ, డిసెంబరు 4: రోడ్డుపై ఓ వాహనం అడ్డంగా నిలిచిపోతే.. ట్రాఫిక్‌కు అంతరాయం కలగకుండా దాన్ని పక్కకు నెట్టేస్తుంటాం. కానీ.. అది కారు, బస్సు, లారీ వరకే పరిమితం. అంతకు మించిన భారీ వాహనాన్ని నెట్టడం ఎప్పుడైనా చూశారా? ఆ అవకాశమే లేదు.. అనుకుంటున్నారా! అయితే.. ఇలాంటి అరుదైన సన్నివేశం నేపాల్‌లో ఆవిష్కృతమైంది. అక్కడి ప్రజలు ఏకంగా ఓ విమానాన్నే అలవోకగా పక్కకు నెట్టేశారు. అక్కడి కోల్టిలోని బజురా ఎయిర్‌పోర్టులో రన్‌వేపై ‘తార’ ఎయిర్‌లైన్స్‌కు చెందిన ఓ చిన్న విమానం నిలిచిపోయింది. ఓ టైరు పగిలిపోవడంతో.. అది కదిలే పరిస్థితి లేకపోయింది. అది పక్కకు వెళితే గానీ.. మరో విమానం ఆ రన్‌వేపై దిగలేదు. ఆ విమానాశ్రయంలో క్రేన్లు కూడా అందుబాటులో లేకపోవడంతో.. ఈ విమానాన్ని పక్కకు నెట్టే బాధ్యతను అక్కడున్న ప్రయాణికులే తీసుకున్నారు. ఓ 20 మంది ప్రయాణికులు, సెక్యూరిటీ సిబ్బంది కలిసి.. ఓ కారునో, బస్సునో తోసినంత సులువుగా ఆ విమానాన్ని పక్కకు నెట్టేశారు. దీంతో.. తర్వాతి విమానం రన్‌వేపై దిగేందుకు అవకాశం దొరికింది. ప్రస్తుతం ఈ వీడియో.. నెట్టింట హల్‌చల్‌ చేస్తోంది. ఇది చూసిన నెటిజన్లు.. ‘ఇది నేపాలీలకు మాత్రమే సాధ్యమైంది. ఎప్పుడూ చూడలేమనుకున్న సన్నివేశాన్ని చూపించినందుకు కృతజ్ఞతలు’ అంటూ కామెంట్లు చేస్తున్నారు. 

Advertisement
Advertisement