Advertisement
Advertisement
Latest Telugu News
Advertisement
Published: Sun, 02 Jan 2022 09:26:59 IST

బాణసంచా కర్మాగారంలో పేలుడు

twitter-iconwatsapp-iconfb-icon
బాణసంచా కర్మాగారంలో పేలుడు

- ఐదుగురి దుర్మరణం

- ఏడుగురికి తీవ్ర గాయాలు

- శివకాశి సమీపంలో దుర్ఘటన


చెన్నై: కొత్త ఏడాది తొలిరోజు విరుదునగర్‌ జిల్లాలో విషాదం చోటు చేసుకుంది. శివకాశి సమీపంలోని ఓ ప్రైవేటు బాణసంచా కర్మాగారంలో పేలుడు సంభవించి ఐదుగురు కార్మికులు దుర్మరణం చెందారు. మరో ఏడుగురు తీవ్రంగా గాయపడి ఆస్పత్రిలో చికిత్స పొందుతున్నారు. వివరాలిలా... మేట్టుపట్టికి చెందిన వళివిడు మురుగన్‌ అనే వ్యక్తి నిర్వహిస్తున్న బాణసంచా కర్మాగారంలో రోజూ సుమారు వందమంది కార్మికులు పని చేస్తుంటారు. ఈ కర్మాగారంలో మొత్తం 23 గదులు, బాణసంచా తయారీకి ఉపయోగించే మందుగుండు నిల్వలను భద్రపరిచే విశాలమైన భవనం ప్రత్యేకంగా వున్నాయి. శనివారం ఉదయం తొమ్మిది గంటల ప్రాంతంలో ఆ భవనంలో కార్మికులు మందుగుండు కలు పుతుండగా, రాపిడికి హఠాత్తుగా మంటలు చెలరేగి పెద్ద శబ్ధంతో పేలుడు సంభవించింది. ఆ ధాటికి ఆ భవనం నేలమట్టమైంది. ఆ సమయంలో అక్కడ పని చేస్తున్న కార్మికులు శిథిలాల కింద చిక్కుకుపోయారు. పేలుడు సంభవించిన వెంటనే ఆ భవనం పక్కనే ఉన్న గదులలో పనిచేస్తున్న కార్మికులంతా ప్రాణభయంతో పరుగులు తీశారు. ఈ ప్రమాదం గురించి తెలియగానే పోలీసులు, అగ్నిమాపక సిబ్బంది హుటా హుటిన అక్కడికి చేరుకున్నారు. శివకాశి, శ్రీవిల్లిపుత్తూరు, విరుదునగర్‌, వత్తిరిరుప్పు ప్రాంతాల నుంచి నాలుగు ఫైరింజన్లతో అగ్నిమాపక దళం గంటకు పైగా శ్రమంచి మంటలను అదుపుచేశారు. ఆ తర్వాత ఎక్సకవేటర్లతో భవన శిథిలాలను తొలగించగా, నలుగురు కార్మికుల మృతదేహాలు బయల్పడ్డాయి. అదే విధంగా శిథిలాల మధ్య చిక్కుకుని తీవ్రంగా గాయపడి వున్న మరో ఎనిమిదిమందిని కూడా పోలీసులు రక్షించారు. క్షతగాత్రులను అంబులెన్స్‌లో శివకాశి ప్రభుత్వ ఆస్పత్రికి తరలించారు. అక్కడ చికిత్స పొందుతూ మరో కార్మికుడు మృతి చెందాడు. మృతుల్లో ఒకరిని మునియాండి (40)గా పోలీసులు గుర్తించారు. శిథిలాల తొలగింపు సమయంలో కాసేపు వర్షం కురవటంతో అంతరాయం కలిగింది. అ తర్వాత వేగంగా శిథిలాలను తొలగించారు. జిల్లా ఎస్పీ ఎం.మనోహర్‌ ఇతర పోలీసులు అధికారులు ప్రమాద స్థలాన్ని పరిశీలించారు.

Advertisement
ABN Youtube Channels ABN Indian Kitchen ABN Entertainment Bindass NewsBindass News ABN Something Special ABN Devotional ABN Spiritual Secrets ABN Telugu ABN Telangana ABN National ABN International
Advertisement
OpinionPoll
Advertisement
Copyright © and Trade Mark Notice owned by or licensed to Aamoda Publications PVT Ltd.
Designed & Developed by AndhraJyothy.