‘ఫికా’ తొలి మహిళా చీఫ్‌గా లీసా స్థాలేకర్‌
ABN , First Publish Date - 2022-06-22T09:53:45+05:30 IST
ఆస్ట్రేలియా మాజీ మహిళా క్రికెటర్‌, కామెంటేటర్‌ లీసా స్థాలేకర్‌కు అరుదైన గౌరవం దక్కింది.
లండన్‌: ఆస్ట్రేలియా మాజీ మహిళా క్రికెటర్‌, కామెంటేటర్‌ లీసా స్థాలేకర్‌కు అరుదైన గౌరవం దక్కింది. ఫెడరేషన్‌ ఆఫ్‌ ఇంటర్నేషనల్‌ క్రికెటర్స్‌ అసోసియేషన్‌ (ఫికా) అధ్యక్ష పదవిని దక్కించుకున్న తొలి మహిళగా రికార్డుకెక్కింది.
స్విట్జర్లాండ్‌లోని నియాన్‌ వేదికగా జరిగిన ఫికా ఎగ్జిక్యూటివ్‌ కమిటీ సమావేశంలో 42 ఏళ్ల లీసాను అధ్యక్షురాలిగా ఎన్నుకుంటూ నిర్ణయం తీసుకున్నారు. ఇప్పటిదాకా ఈ పదవిలో కొనసాగిన ఇంగ్లండ్‌ మాజీ బ్యాటర్‌ విక్రమ్‌ సోలంకి స్థానంలో లీసా బాధ్యతలు చేపట్టనున్నారు. దక్షిణాఫ్రికా మాజీ బ్యాటర్‌ బారీ రిచర్డ్స్‌, వెస్టిండీస్‌ మాజీ ఆల్‌రౌండర్‌ జిమ్మీ ఆడమ్స్‌ గతంలో ఈ పదవులను నిర్వర్తించారు. 1988లో స్థాపించబడిన ఫికా అంతర్జాతీయ క్రికెటర్ల సమస్యలు, అంశాలను ఎప్పటికప్పుడు ఎత్తి చూపుతుంది.
