ఏడీ ఆ పసివాడు
ABN , First Publish Date - 2021-06-18T06:02:21+05:30 IST
ఏడీ ఆ పసివాడు కనిపించడం లేదు సత్యం మాట్లాడే ఆ పసివాడు సూటిగా చూసే ఆ చిన్నవాడు...
ఏడీ ఆ పసివాడు
కనిపించడం లేదు
సత్యం మాట్లాడే ఆ పసివాడు
సూటిగా చూసే ఆ చిన్నవాడు
భయం అంటే తెలియని అమాయకుడు
కనిపించకుండా పోయాడేం ...?
భయపడ్డాడా ...!
ఈ అవకాశవాదులను
ఈ బూట్లు నాకే వ్యక్తులను
ఈ పొగడ్తల భజనబృందాలను
భయంతో అనునిత్యం భయపడేవాళ్ళను
ఈ మూర్ఖులను చూడలేక పారిపోయాడా...
కనిపించకుండా పోయాడా...?
ఏదైనా చెట్టుతొర్రలో దాక్కున్నాడా
ఏ చెరువుగట్టు మీదో కునుకు తీస్తున్నాడా
ఏదైనా రాజద్రోహం కేసులో ఇరుక్కున్నాడా...
కోర్టుధిక్కార కేసులో బందీ అయినాడా
గ్రహాంతరాలకి వెళ్ళిపోయాడా
హత్య చేయబడ్డాడా
గూగుల్లో దొరకడం లేదు
మాప్స్కీ చిక్కడం లేదు
ఎంత వెతికినా దొరకడం లేదు
ఒక్కసారి ఆ పసివాడిని చూడాలి
ఒక్కసారి గుండెలకు హత్తుకోవాలి
రాజుకీ
రాజు నిర్ణయాలను సమీక్షించే తీర్పరికి కూడా
ఒంటిమీద దుస్తులు లేవని చెప్పే చేవగల
ఆ పిల్లవాడు, ఇప్పుడీ దేశానికి కావాలి
ఆ ధైర్యం ఇక్కడెవరికీ లేదిప్పుడు
ఇదేమాట మిత్రునితో అంటే
అతనన్నాడు-
ఆ కుర్రవాడు ఉన్నా
అతడు సత్యం చెప్పినా
అతనితో కోరస్ అందుకునే వాళ్ళిప్పుడు లేరు
అందుకున్నా ఆలోచించే వ్యక్తులూ లేరు
ఇప్పుడంతా-
నవ్విపోదురు గాక నాకేటి సిగ్గు
అని సాగిపోయేవాళ్ళే ...
(ఓ బెంగాలి కవిత స్పూర్తితో)
రాజేందర్ జింబో