చాపరాలపల్లిలో దుప్పి మాంసం విక్రయం

తొమ్మిది మంది కూలీలపై కేసు నమోదు చేసిన అటవీశాఖ అధికారులు

ఒకరోజు ఆలస్యంగా కేసు నమోదు చేయడంపై అనుమానాలు 

ములకలపల్లి, జులై 17: వీధి కుక్కల దాడిలో గాయపడి మృతి చెందిన దుప్పిని కూలీలు వాటాలు పంచుకొని ఇంటికి తీసుకెళ్లిన ఘటనపై ఒకరోజు ఆలస్యంగా కేసు నమోదైంది.  భద్రాద్రి కొత్తగూడెం జిల్లా ములకలపల్లి మండలం చాపరాలపల్లిలో శుక్రవారం ఈ ఘటన జరిగింది.   మండల పరిధిలోని చాపరాలపల్లి గ్రామ శివారులో శుక్రవారం కొంతమంది కూలీలు వరిపొలంలో నాటు వేస్తుండగా అటుగా ఓ దుప్పిని వీధి కుక్కలు తరుముకుంటూ వచ్చి దాడి చేశాయి. ఈ వీధి కుక్కల దాడిలో గాయపడి మృతి చెందిన దుప్పి కళేబారాన్ని కూలీలు తమ వెంట తీసుకెళ్లి మాంసాన్ని వాటాలుగా పంచుకొని ఇంటికి తీసుకెళ్లారు. అయితే వాటాల పంపకంలో విభేదాలు తలెత్తడంతో ఈ విషయం అందరికీ తెలిసింది. దాంతో కొందరు ఈ విషయాన్ని అటవీశాఖ అధికారులకు సమాచారం ఇచ్చారు. అయితే ఈ ఘటనలో అటవీశాఖ అధికారులకు, మాంసం విక్రయదారులకు మధ్య సయోధ్య కుదరకపోవడంతోనే ఈ ఘటన వెలుగులోకి వచ్చినట్లు ఆరోపణలు వినిపిస్తున్నాయి. శనివారం ఈ ఘటనలో 9మంది కూలీలపై అటవీ శాఖ అధికారులు వన్యప్రాణుల చట్టం కింద కేసు నమోదు చేశారు.