Chitrajyothy Logo
Advertisement
Published: Sat, 08 Jan 2022 21:04:27 IST

అఖిల్‌తో ‘బంగార్రాజు’ సీక్వెల్.. కష్టమే: డైరెక్టర్ కళ్యాణ్ కృష్ణ

twitter-iconwatsapp-iconfb-icon
అఖిల్‌తో బంగార్రాజు సీక్వెల్.. కష్టమే: డైరెక్టర్ కళ్యాణ్ కృష్ణ

కింగ్ నాగార్జున, యువసామ్రాట్ నాగచైతన్య, రమ్యకృష్ణ, కృతిశెట్టి హీరోహీరోయిన్లుగా కళ్యాణ్ కృష్ణ దర్శకత్వంలో తెరకెక్కిన చిత్రం ‘బంగార్రాజు’. అన్నపూర్ణ స్టూడియోస్ ప్రై.లి., జీ స్టూడియోస్ సంయుక్తంగా నిర్మిస్తున్న ఈ చిత్రానికి నాగార్జున నిర్మాతగా వ్యవహరించారు. ఈ చిత్రం సంక్రాంతి సందర్భంగా జనవరి 14న థియేటర్లలో విడుదల కాబోతోంది. ఈ సందర్భంగా దర్శకుడు కళ్యాణ్ కృష్ణ మీడియాకు చిత్ర విశేషాలను తెలియజేశారు.


ఈ సందర్భంగా ఆయన మాట్లాడుతూ..

‘‘నాగార్జునగారికి 2014లో ‘సోగ్గాడే చిన్నినాయనా’ కథను వినిపించా. 2016లో ఆ చిత్రం విడుదలైంది. ఆ రోజే ‘బంగార్రాజు’ సినిమా చేయాలని ఫిక్స్ అయ్యాం. మధ్యలో చైతన్యతో ఓ సినిమాను తీస్తే నాగార్జునగారే నిర్మించారు. మొదటి నుంచి కూడా మా మధ్య ర్యాపో ఉంది. ప్రతీ విషయంలో ఆయన నాకు సపోర్ట్ చేస్తూనే వచ్చారు. మా ఇద్దరి మధ్య అండర్ స్టాండింగ్ ఉంది. నేను ఏం చెప్పాలని అనుకుంటున్నానో ఆయనకు అర్థమవుతుంది. ఆయన ఏం చెప్పాలని అనుకుంటున్నారో నాకు అర్థమవుతుంది. మా మధ్య కమ్యూనికేషన్ గ్యాప్ లేదు. ‘సోగ్గాడే చిన్నినాయనా’ లైన్ నాది కాదు. రామ్ మోహన్‌గారి పాయింట్ అది. వేరే దర్శకుడిని ముందుగా అనుకున్నారు. నేను వేరే సినిమా కోసం నాగార్జునగారికి ఓ కథ వినిపించాను. అయితే ఆ కథ నా వద్దకు వచ్చింది. ఓ పదిహేను రోజులు ఆ కథ మీద కూర్చున్నాను. ఆ తరువాత కథను నాగార్జునగారికి వినిపించాను. ఫస్ట్ నెరేషన్‌లోనే ఒకే చేశారు. ఆ సినిమా పూర్తయిన వెంటనే ‘బంగార్రాజు’ చేయాలని అనుకున్నాం.. కానీ చైతన్యతో ముందు ఓ సినిమా చేయమని నాగార్జునగారు అన్నారు. కానీ అప్పటికే నాగచైతన్య సవ్యసాచి, శైలజా రెడ్డి అల్లుడు కమిట్మెంట్‌లతో ఉన్నారు. ఆ గ్యాప్‌లో నేను నేల టికెట్ సినిమాను చేశాను.

‘సోగ్గాడే చిన్నినాయనా’ చిత్రానికి సీక్వెల్‌గా ‘బంగార్రాజు’ ఉంటుంది. ఫ్రీక్వెల్ కాదు. రెండు సినిమాలను కలిపి చూస్తే ఐదు గంటలు అవుతుంది. సోగ్గాడే ఎక్కడ ఎండ్ అయిందో.. బంగార్రాజు అక్కడ మొదలవుతుంది. జనరేషన్ తేడా ఉంటుంది తప్పా బంగార్రాజు పాత్రలో తేడా ఉండదు. బంగార్రాజు మనవడిగా చైతూ కనిపిస్తారు. పెద్ద బంగార్రాజు పాత్ర ఎలా ఉండేదో.. చిన్న బంగార్రాజు పాత్ర కూడా అలానే ఉంటుంది. అనుకున్న సమయానికి ఈ సినిమాను రెడీ చేయడమే పెద్ద సవాల్‌గా అనిపించింది. వేరే సినిమాలతో కాకుండా ‘సోగ్గాడే చిన్నినాయనా’ సినిమాతో అందరూ పోల్చుతారు.. వీఎఫ్ఎక్స్‌ కూడా చాలా ఎక్కువే ఉంటుంది. అలా కాలంతో పాటుగా పరిగెత్తాల్సి వచ్చింది. సినిమాను ప్రారంభించడమే సంక్రాంతి టార్గెట్‌తో స్టార్ట్ చేశాం. ముందు నుంచి సంక్రాంతికి అనుకున్నాం. కానీ డేట్ మాత్రం ఫిక్స్ చేయలేదు. మొన్నే సెన్సార్ అయింది. జీరో కట్స్‌తో యూఏ సర్టిఫికేట్ వచ్చింది. సెన్సార్ వాళ్లు సినిమా పండుగలా ఉందని అన్నారు.


ఇద్దరిలో ఎవ్వరూ తగ్గకూడదు.. అందుకే స్క్రిప్ట్‌కు ఇంత సమయం పట్టింది. మొదట్లో కొంత మంది నాగచైతన్యది గెస్ట్ కారెక్టర్ అని రాశారు. రెండు పాత్రలు సమానంగా ఉంటాయి. ఇద్దరూ హీరోలకు ప్రతీ ఎమోషన్ సమానంగా ఉంటుంది. చాలా తెలివైనదాన్ని అని అనుకునే అమాయకురాలి పాత్రలో కృతి శెట్టి కనిపిస్తుంది. సోగ్గాడే చిన్నినాయనా సినిమాలో ఉన్నట్టుగా రమ్యకృష్ణగారి పాత్ర కంటిన్యూ అవుతుంది. పాటలో ఫన్ ఉంటే నాగార్జున గారు ఫుల్ ఎంజాయ్ చేస్తారు. అందులో కల్లు మీద పాట పాడారు. ఇందులో కబడ్డీ మీద పాట పాడారు. ఈ పాట ఎవరు పాడినా ఎంజాయ్ చేస్తారు. కానీ ఆయన పాడితే ఇంకాస్త ఎక్కువ ఎంజాయ్ చేస్తారు. అందుకే నాగార్జున గారితో పాడించాం. సెంటిమెంట్ కోసం కాదు. ఈ సినిమాకు సంగీతమే ప్రధాన బలం. ఇప్పటి వరకు మూడు పాటలు వచ్చాయి. ఇంకా మూడు పాటలు రానున్నాయి. దేనికదే ప్రత్యేకంగా ఉంటుంది. ఆడియో ఎంత బాగుంటుందో.. మేకింగ్ పరంగా కూడా అంతే బాగుంటుంది. ఆర్ఆర్ అద్బుతంగా ఉంటుంది. మాకే కంట్లో నీళ్లు తిరిగాయి. జనవరి 9న మ్యూజికల్ ఈవెంట్ ఉంది. అందులోనే పాటలు విడుదల చేస్తాం.


అఖిల్‌తో బంగార్రాజుకు సీక్వెల్ అంటే కష్టం. ముందు కథ రాసి.. దానితో నేను సంతృప్తి చెందాలి. ఆ తర్వాత వారిని మెప్పించాలి. ఎగ్జైట్ చేసే పాయింట్ దొరికితే ఉండొచ్చు. కానీ ఇప్పటి వరకు అలాంటి ఆలోచన అయితే లేదు. ప్రతీ దర్శకుడి అన్ని రకాల సినిమాలను చేయాలని ఉంటుంది. నేను నెక్స్ట్ చేసే సినిమా మాత్రం ఈ జానర్‌లో ఉండదు. ఏ సినిమా చేసినా కూడా ఎమోషన్ మాత్రం ఉండాలి. ఎమోషన్ కనెక్ట్ అయితేనే సినిమా హిట్ అవుతుంది. కామెడీ సినిమా అయినా కూడా ఎమోషనట్ టచ్ అవ్వాల్సిందే. ఈవీవీ గారి సినిమాల్లో కామెడీ ఉన్నా కూడా ఎమోషన్ ఉంటుంది. జీవితంలో మూడు దశల్లో ఉండే ప్రేమకథతో ఓ సినిమా అనుకున్నాను. అందులో యంగ్ పాత్రలో నాగ చైతన్య, మిగిలిన పాత్రలో నాగార్జునగారు అని అనుకున్నాను. ఆ కథ అయితే ఉంది. ఎప్పుడు చేస్తాను అనేది తెలీదు. జ్ఞానవేల్ రాజాగారితో ఓ సినిమా ఉంటుంది. కథ, హీరో అనేది ఇంకా నిర్ణయించలేదు. హీరోను బట్టి ద్విభాష చిత్రంగా ఉండొచ్చు. కానీ నేను మాత్రం తెలుగు ప్రేక్షకులను దృష్టిలో పెట్టుకునే సినిమాను తీస్తాను. నాకు పాన్ ఇండియన్ ఆలోచనలు లేవు. ప్రస్తుతం సినిమాల మీదే ఫోకస్ పెట్టాను. వెబ్ సిరీస్‌ల గురించి ఆలోచన లేదు..’’ అని తెలిపారు.

Advertisement
ABN Youtube Channels ABN Indian Kitchen ABN Entertainment Bindass NewsBindass News ABN Something Special ABN Devotional ABN Spiritual Secrets ABN Telugu ABN Telangana ABN National ABN International
Advertisement
Advertisement