కుడి చెరువు రిజర్వాయర్గా మారేదెన్నడో..?
ABN , First Publish Date - 2022-05-27T05:24:51+05:30 IST
పట్టణంలోని కుడి చెరువు రిజర్వాయర్గా మార్చే ప్రతిపాదన కాగితాలకే పరిమితం అయ్యింది.
-ఏళ్లుగా ప్రతిపాదనలకే పరిమితం
చొప్పదండి, మే 26: పట్టణంలోని కుడి చెరువు రిజర్వాయర్గా మార్చే ప్రతిపాదన కాగితాలకే పరిమితం అయ్యింది. దశాబ్ధాల కల నెరవేరడం లేదు. పట్టణానికి ఆనుకొని ఉన్న ఈ చెరువును కాదని మండలంలోని రెవెల్లి చెరువును మినీ ట్యాంక్బండ్గా మార్చాగా, ఈ చెరువు అభివృద్ధికి నోచుకోవడం లేదు. 40 ఏళ్ల కిందటే కుడి చెరువును రిజర్వాయర్గా మార్చాలని ప్రతిపాదించారు. చెరువు శిఖం భూమి నుంచి కాకతీయ కాలువ పోతుండగా, తూమును ఏర్పాటు చేసి నీటిని చెరువులోకి మళ్లించాలని ప్రతిపాదించారు. చెరువును రిజర్వాయర్గా మార్చితే అదనపు ఆయకట్టు సాగులోకి రావడంతోపాటు పట్టణంలో భూగర్భ నీటి మట్టం బాగా పెరుగుతుంది. ప్రస్తుత పరిస్థితుల్లో చెరువు నిండినా ఆయకట్టు కింద రెండు పంటల సాగు కు నీరు అందడం లేదు. అతి తక్కువ ఖర్చుతో ఈ చెరువును రిజర్వాయర్గా మార్చే అవకాశం ఉంది. చెరువుకు కింద 700 ఎకరాల ఆయకట్టు ఉండగా రిజర్వాయర్గా మార్చితే మరో 500 ఎకరాల ఆయకట్టు పెరిగే అవకాశం ఉంది. అధికారులు, ప్రజాప్రతినిధులు స్పందించి చర్యలు తీసుకోవాలని ప్రజలు కోరుతున్నారు.