పేదరైతుకు ‘డ్రాగన్‌’ అందని మావేనా?

కేంద్రం వరమిచ్చినా... పట్టించుకోని రాష్ట్రం

ఉపాధిలో డ్రాగన్‌ ఫ్రూట్స్‌ సాగుకు కేంద్రం ఓకే

రాష్ట్ర సర్కారూ అనుమతిస్తే అన్నదాతకు భారీ ఊరట

అమరావతి, సెప్టెంబరు 22(ఆంధ్రజ్యోతి): ఉపాధిహామీ పథకం ద్వారా డ్రాగన్‌ ఫ్రూట్స్‌ సాగు చేసుకునేందుకు కేంద్రం అనుమతించినా... రాష్ట్రంలో మాత్రం దానిని పట్టించుకోలేదన్న విమర్శలున్నాయి. డ్రాగన్‌ ఫ్రూట్స్‌ సాగుకు ఉపాధి హామీలో నిధులందించేందుకు కేంద్రం అనుమతించింది. రాష్ట్రంలో గ్రామీణాభివృద్ధిశాఖ అధికారులు మాత్రం ఈ పంటను ఉపాధి పథకంలో సాగు చేసుకునేందుకు అనుమతివ్వడంలో జాప్యం చేస్తుండటంతో రైతులు నష్టపోతున్నారు. ప్రకాశం, గుంటూరు, కృష్ణాతో పాటు రాయలసీమలోని పలు జిల్లాల్లో ఈ పంటను విస్తారంగా సాగుచేస్తున్నారు. ఈ పంట సాగు ఖర్చుతో కూడినది కావడంతో చిన్న, సన్నకారు రైతులు ఈ స్థాయిలో పెట్టుబడులు పెట్టి సాగుచేసే పరిస్థితి లేదు.

అయితే కేంద్ర ప్రభుత్వం చిన్న రైతులు కూడా ఈ పంట సాగుచేసుకుని లాభాలు గడించాలనే ఆశయంతో ఉపాధి హామీ చట్టంలో ఈ పంటకు అనుమతించారు. మన రాష్ట్రంలో ఈ పంట సాగుచేయాలంటే ఎకరాకు రూ.6లక్షల దాకా ఖర్చవుతుందని అంచనా. ఒక్కో ఎకరాకు రూ.2 లక్షల కంటే ఎక్కువ మెటీరియల్‌ నిధులు ఈ పంట సాగుకు ఖర్చుచేసే వెసులుబాటు లేనందున అనుమతించేందుకు పంచాయతీరాజ్‌, గ్రామీణాభివృద్ధిశాఖ అధికారులు మీనమేషాలు లెక్కిస్తున్నారు. గతంలో మన రాష్ట్రంలో ఉద్యానవన శాఖ అధికారులు ఈ పంట సాగుచేసుకునే రైతులకు ఎకరాకు రూ.2 లక్షలు సబ్సిడీ అందించేవారు. గతేడాది నుంచి ఈ సబ్సిడీ నిలిపేశారు. గత ఏడాది అయితే ప్రకాశం జిల్లాలో ఒక్క హెక్టార్‌కు మాత్రమే డ్రాగన్‌ఫ్రూట్స్‌ పంట వేసేందుకు అనుమతించారు. ఉపాధి హామీ పథకంలోనైనా ఈ పంట సాగుకు సాయం అందిస్తే అనేక మంది పేద  రైతులు డ్రాగన్‌ ఫ్రూట్స్‌ పంటను సాగుచేసుకునే వీలుంటుంది.