ఈ విజయం బాధ్యతను మరింత పెంచింది
ABN , First Publish Date - 2022-02-23T14:29:22+05:30 IST
మున్సిపల్ ఎన్నికల్లో తమ పార్టీ విజయఢంకా మోగించడంపై ముఖ్యమంత్రి, డీఎంకే అధ్యక్షుడు ఎంకే స్టాలిన్ సంతోషం వ్యక్తం చేశారు. ఇంతటి విజయాన్ని చేకూర్చి పెట్టిన ప్రజలకు ధన్యవాదాలు తెలిపారు. ఈ
- మా పాలనకు ప్రజలిచ్చిన సర్టిఫికెట్
- అన్నాడీఎంకే కంచుకోట బద్దలు
- సీఎం స్టాలిన్
అడయార్(చెన్నై): మున్సిపల్ ఎన్నికల్లో తమ పార్టీ విజయఢంకా మోగించడంపై ముఖ్యమంత్రి, డీఎంకే అధ్యక్షుడు ఎంకే స్టాలిన్ సంతోషం వ్యక్తం చేశారు. ఇంతటి విజయాన్ని చేకూర్చి పెట్టిన ప్రజలకు ధన్యవాదాలు తెలిపారు. ఈ విజయంతో తాము గర్వించడం లేదని, ఇది తమ బాధ్యతను మరింత పెంచిందని పేర్కొన్నారు. మంగళవారం సాయంత్రం తేనాంపేటలోని డీఎంకే ప్రధాన కార్యాలయానికి వచ్చిన స్టాలిన్.. కార్యకర్తలు, నేతలకు శుభాకాంక్షలు తెలిపారు. ఈ సందర్భంగా ఆయన మీడియాతో మాట్లాడుతూ.. ఈ విజయం తమ తొమ్మిది నెలల పాలనకు ప్రజలు ఇచ్చిన సర్టిఫికెట్ లాంటిదన్నారు. పార్టీ శ్రేణులు ఈ విజయాన్ని ఆడంబరంగా జరుపుకో వాల్సిన అవసరం లేదన్నారు. ఇది తమకు బాధ్యతలాంటిదేనన్న విషయాన్ని గుర్తెరగాలని వినమ్రంగా ప్రకటించారు. అదేసమయంలో గెలుపొందిన అభ్యర్థులు ఎలాంటి ఆరోపణలు రాకుండా జాగ్రత్తగా ఉండాలని, ఏ చిన్న ఆరోపణ వచ్చినా కఠిన చర్యలు తప్పవని హెచ్చరించారు. మహిళలకు అధికారాన్ని అప్పగించడమే డీఎంకే లక్ష్యమన్నారు. అన్నాడీ ఎంకే కంచుకోటలను సైతం బద్ధలు కొట్టామని ఆయన వెల్లడించారు. ద్రావిడ నమూనా పాలన ప్రజల ఆమోదానికి లభించిన విజయంగా స్టాలిన్ అభివర్ణించారు.